12:00 საათზე თბილისიდან დვანის მიმართულებით გავლენ ქართული მედიასაშუალებების ჟურნალისტები, რომლებიც სოფელ დვანში, ე.წ. სადემარკაციო ზოლთან რუსეთის მიერ წარმოებულ მცოცავ ოკუპაციას გააპროტესტებენ.

აქცია სოციალურ ქსელ „ფეისბუქში“ დაანონსდა და მასში მონაწილეობის სურვილი ათეულობით ჟურნალისტმა გამოთქვა. აქცია მშვიდობიანი იქნება და მასში მხოლოდ ჟურნალისტები მონაწილეობენ: მასმედიელებმა დაამზადეს ტრანსპარანტები ქართულ, ინგლისურ და რუსულ ენებზე, სადაც ოკუპაციის საწინააღმდეგო მოწოდებებია ჩამოწერილი.

ჟურნალისტების დასახვედრად საგანგებოდ ემზადებიან ე.წ. სამხრეთ ოსეთის რესპუბლიკის ზალოვანი სტრუქტურების წარმომადგენლები და რუსი ოკუპანტები. გავრცელდა ცხინვალის დე–ფაქტო ხელისუფლების წარმომადგენელთა განცხადება, რომ საქართველოს ხელისუფლება ჟურნალისტების აქციას აწყობს, რაც არ გამორიცხავს პროვოკაციას. მოსალოდნელი გართულებების შემთხვევაში ოსური მხარე პასუხისმგებლობას საქართველოს ხელისუფლებას აკისრებს.

თავის მხრივ, აქციის კავშირს სახელისუფლებო წრეებთან და ნებისმიერ პოლიტიკურ ძალასთან კატეგორიულად გამორიცხავენ საპროტესტო აქციის ორგანიზატორები:

„ეს არის სპონტანურად დაგეგმილი აქცია და მიზნად ისახავს ჟურნალისტების მხრიდან მოქალაქეობრივი პოზიციის დაფიქსირებას. ჩვენ მკაცრად გავაკონტროლებთ, რომ აქციის მონაწილეთა შორის მხოლოდ ჟურნალისტები იყვნენ. შესაბამისად, ყოველგვარ პროვოკაციას გამოვრიცხავთ, აქცია მშვიდობიანია და სიტუაციის დაძაბვას არ ისახავს მიზნად“, – აცხადებენ ისინი.

აქციის შესახებ ღონისძიების მოსაწვევი გვერდი „ფეისბუქზე“ ორი დღის წინ გაჩნდა. ამ დროისთვის არსებული მონაცემებით, აქციაში მონაწილეობის სურვილი ასამდე ჟურნალისტმა გამოთქვა.