საპარლამენტო უმრავლესობის წევრები, ზურაბ აბაშიძე და ირინა იმერლიშვილი, საკანონმდებლო ორგანოში გამოდიან ინიციატივით, რომ საქართველოს მოქალაქეებს ქვეყნის დატოვების უფლება სახელმწიფო ინტერესებიდან გამომდინარე შეეზღუდოთ. აღნიშინულ თემასთან დაკავშირებით აბაშიძე "ფეისბუქის" საკუთარ გვერდზე განმარტებებს აკეთებს:

"სახელმწიფოსა და მისი ყოველი მოქალაქის უსაფრთხოების დაცვის ინტერესებიდან გამომდინარე, კომპეტენტური ორგანო უფლებამოსილია საქართველოდან პირის დროებითი გასვლის უფლების შეზღუდვასთან დაკავშირებით დასკვნის გამოტანისათვის, რაც შეიძლება გამოწვეული იყოს პირის ტერორისტულ ორგანიზაციასთან თანამშრომლობით და ა.შ. ამასთან, პირი ინფორმირებული არ არის იმ კონკრეტული, რეალური მიზეზის თაობაზე, თუ რატომ ეთქვა უარი საქართველოდან დროებითი გასვლისათვის, წინააღმდეგ შემთხვევაში შეიძლება ზიანი მოჰყვეს სახელმწიფო ან/და საზოგადოებრივ ინტერესებს. გასათვალისწინებელია, რომ კომპეტენტური ორგანოს მიერ მიღებული დასკვნა ატარებს დროებით ხასიათს და შესაბამისად, პიროვნებას არ ართმევს შესაბამის ორგანოში მის მიმართ მიღებული გადაწყვეტილების (ქმედება) გასაჩივრების უფლებას. ასეთ შემთხვევაში სასამართლო გამოითხოვს კომპეტენტური ორგანოს მიერ მიღებულ დასკვნას, ასევე პიროვნების საქართველოდან გასვლის უფლების შეზღუდვასთან დაკავშირებულ სხვა აუცილებელ მასალას და არასაკმარისი მტკიცებულებების არსებობისას უფლებამოსილია გააუქმოს პიროვნების მიმართ მიღებული შეზღუდვის გადაწყვეტილება. მხედველობაშია მისაღები ის გარემოებაც, რომ კომპეტენტური ორგანოს მიერ სასამართლოს მასალები გაეგზავნება სახელმწიფო საიდუმლოების წესების დაცვით“, - წერს ზურაბ აბაშიძე სოციალურ ქსელში.