საარჩევნო ადმინისტრაცია ამომრჩევლებისთვის საინფორმაციო ბარათების დარიგებას იწყებს

საზოგადოება - 11:10, 27 Sep, 2013

1404

27 სექტემბრიდან საარჩევნო ადმინისტრაცია იწყებს ამომრჩევლებისთვის საინფორმაციო ბარათების დარიგებას. საინფორმაციო ბარათები ამომრჩევლებს დაურიგდებათ საუბნო საარჩევნო კომისიების წევრების მეშვეობით.
ცესკო მიმართავს ამომრჩევლებს:
თუ თქვენს მონაცემებში აღმოაჩენთ უზუსტობას ან მიიღებთ იმ ამომრჩევლის ბარათს, რომელიც თქვენს მისამართზე არ არის რეგისტრირებული, წერილობითი განცხადებით მიმართეთ შესაბამის საუბნო საარჩევნო კომისიას ან იუსტიციის სამინისტროს სახელმწიფო სერვისების განვითარების სააგენტოს შესაბამის ფილიალს. თუ საერთოდ ვერ მიიღეთ საინფორმაციო ბარათი ან თქვენი მონაცემების გადასამოწმებლად გესაჭიროებათ დამატებითი ინფორმაცია, დაუკავშირდით ცესკოს ცხელ ხაზს ნომერზე - 2 51 00 51. ამომრჩევლების მიერ მომართვის ბოლო ვადაა 11 ოქტომბერი.
წინა არჩევნების დროს ამომრჩეველთა ბარათები რიგდებოდა მხოლოდ ერთხელ, არჩევნებამდე 2-3 დღით ადრე. ამ არჩევნების წინ კი, ამომრჩეველთა უფრო მეტი ინფორმირების მიზნით, დარიგდება ორჯერ.
ცესკო ასევე ეხმაურება რეგისტრაციიდან მოხსნილ ამომრჩეველთა საკითხს. როგორც ცნობილია, რეგისტრაციიდან მოხსნილმა ამომრჩევლებმა არჩევნებში მონაწილეობის მისაღებად 10 ოქტომბრის ჩათვლით უნდა გაიარონ ხელახალი რეგისტრაცია, სხვა შემთხვევაში ისინი ვერ მიიღებენ არჩევნებში მონაწილეობას. ცესკომ მიიღო გადაწყვეტილება, რომლის მიხედვითაც იუსტიციის სამინისტროს მიერ მოწოდებული რეგისტრაციიდან მოხსნილი ამომრჩეველთა სიები, მათი ბოლო რეგისტრაციის ადგილის მიხედვით გამოიკვრება შესაბამის უბნებში. ეს კიდევ ერთი საშუალება იქნება საცხოვრებელი მისამართის რეგისტრაციიდან მოხსნილი მოქალაქეებისთვის, რომ შეამოწმონ თავიანთი სტატუსი და გამოკრულ სიაში აღმოჩენის შემთხვევაში მიმართონ სახელმწიფო სერვისების განვითარების სააგენტოს რეგისტრაციის გასავლელად.
ცესკო მოუწოდებს მოქალაქეებს აქტიურად ჩაერთონ მონაცემების გადამოწმების პროცესში არჩევნებში მონაწილეობის მისაღებად.