დეპუტატს "ქურდული სამყაროს" წევრთან მეგობრობაში ადანაშაულებენ

სამართალი - 19:38, 26 Sep, 2013

1724

მარნეულის მაჟორიტარ დეპუტატ აზერ სულეიმანოვისა და "ქურდული სამყაროს" წევრის, ვინმე "ჯაბუს" შეხვედრის ამსახველი ფოტომასალა ჟურნალისტებს დღეს ადვოკატმა ირმა ჭკადუამ წარუდგინა. ადვოკატის ინფორმაციით, ფოტომასალა მიმდინარე წლის აგვისტოში გამართულ შეხვედრას ასახავს. „მარნეულში 6 სექტემბერს ფართომასშტაბიანი სპეცოპერაცია ჩატარდა, რომლის დროსაც 12 პირი დააკავეს. მათ ბრალი „ქურდული სამყაროს“ წევრობისთვის წაუყენეს. ბრალდების მხარემ მტკიცებულებებში ფარული ვიდეო და აუდიო მასალა მიუთითა, თუმცა ეს ვიდეო და აუდიო მასალა ბრალდებულების არც ერთ ადვოკატს არ გადაეცა. ჩვენი კატეგორიული მოთხოვნის შემდეგ ფარული ჩანაწერები გადმოგვცეს და გაირკვა, რომ მათზე გადაღებულია აზერ სულეიმანოვი, მარნეულის მოქმედი დეპუტატი, რომლის ფარული ვიდეო და ფოტო გადაღება, ასევე მიყურადება კანონით აკრძალულია.
თუ დაკავებულები მართლაც ქურდული სამყაროს წევრები არიან, მაშინ აზერ სულაიმანოვიც უნდა იყოს დაკავებული.
ამასთან დაკავშირებით მივმართავთ როგორც გენერალურ ინსპექციას, ისე მთავარ პროკურორს და მათგან რეაგირებას მოვითხოვთ. მოვითხოვთ ასევე, თავი დაანებონ ბრალდებების შეთითხნას და მიიღონ კანონშესაბამისი გადაწყვეტილება, ვინაიდან დაკავებული გიორგი კვიციანი უკანონო პატიმარია და მის მიმართ მთელი რიგი პროცედურებია დარღვეული. ცდილობენ, მას ახალი ბრალი შეუთითხნონ", - აღნიშნა ირმა ჭკადუამ.