გორში მუნიციპალიტეტის შენობასთან  სოფელ შინდისის მცხოვრებნი, თანასოფლელის ელგუჯა გელაძის გამართლებას ითხოვენ და აცხადებენ, რომ ის მხოლოდ თავს იცავდა.

მკვლელობა 23 სექტემბერს მოხდა, ბრალდებულმა მრავლობითი ჭრილობა მიაყენა 37 წლის მალხაზ მთვარაძეს. მთვარაძე წარსულში მკვლელობასა და ყაჩაღობაში  იყო ბრალდეული და ის წელს ამნისტიით გათავისუფლდა.

აქციის მონაწილეები აცხადებენ, რომ შემთხვევის დროს ბრალდებული მხოლოდ თავს იცავდა და თავად მთვარაძე უპირებდა მას მოკვლას.

"ის რომელიც მოკლულია ამ ბიჭს დანით მისდევდა, ელგუჯამ დანა წაართვა და თავი დაიცვა, ვითხოვთ რომ გამოუშვან ციხიდან ან შეუმსუბუქონ სასჯელი, მთელი სოფელი აქ ვართ“, - აცხადებენ მეზობლები.

სოფელ შინდისის მოსახლეობა იმუქრება, რომ თუ მათ თხოვნას შს სამინისტრო არ გათვალისწინებს, გარდაცვლილის დაკრძალვის უფლებას მთვარაძეების ოჯახს არ მისცემენ.

 "მთვარობამ რეციდივისტები და ყაჩაღები გამოუშვა და ამის შედეგია რომ ეს ბიჭი ციხეში უნდა ჩაჯდეს.  არ მივცემთ მის ოჯახს მიცვალებულის დამარხვის საშუალებას, თუ სასჯელს არ შეუმსუბუქებენ ან არ გაუშვებენ", - აცხადებს გელაძის მეზობელი.

შენობასთან 150 კაცია შეკრებილი და შს სამინისტროს დაუყონებლივ რეაგირებას სთხოვენ.