წინასაარჩევნოდ ივანიშვლი ისეთი დაპირებების გასცემასაც არ ერიდება, რომელიც მისი არაფორმალური მმართველობის პირობებში ხელისუფლებას არასდროს გახსენებია.

წინა კვირას იგი სოფელ ხიბულაში, ზვიად გამსახურდიას გარდაცვალების ადგილზე იმყოფებოდა, სადაც ადგილობრივებს შეხვდა და მათთვის დაპირებები გასცა. ამის შემდეგ ოლიგარქი ზუგდიდში ჩავიდა და ღვთისმშობლის სახელობის ტაძარში მივიდა, სადაც განაცხადა, რომ ტაძრის მშენებლობაზე მილიონზე მეტის დახარჯვას აპირებს. ივანიშვილი შეხვდა ჭყონდიდელ ეპისკოპოსსაც, თუმცა წინა შეხვედრებისგან განსხვავებით, აუდიენციის ამსახველი მობილური ტელეფონით გადაღბული კადრები არავის გაუვრცელებია.

სხვათაშორის ექსპერტები მობილური ტელეფონით გადაღებული კადრებზე საუბრისას ამბობენ, რომ კამერების გარეშე ხალხთან შეხვედრა ივანიშვილის სტრატეგიის ნაწილია.

პოლიტოლოგები „ნიუპოსტთან“ ივანიშვილის სამეგრელოში გააქტიურებას სანდრა რულოვსის ფაქტორს უკავშირებენ, რომელიც გაერთიანებულმა ოპოზიციამ „ძალა ერთობაშიამ“ ზუგდიდში მერობის კანდიდატად წარადგინა.

ექსპერტები აღნიშნავენ, რომ ყოფილი პრემიერი სანდრა რულოვსის ზუგდიდში გამარჯვებასა და სააკაშვილის გამარჯვებას შორის ტოლობის ნიშანს სვამს. შესაბამისად ხმებზე ნადირობის ბრძოლაში ის პირადად ერთვება.

ესპერტი გია ხუხაშვილი ამბობს, რომ მძიმე დღეში მყოფი ივანიშვილისთვის ნებისმიერ არჩევნებში პრინციპულია. მისი თქმით, ივანიშვილის პიარ-სვლა „ხელისუფლებას ვერ შველის“.

„მას კარგად ესმის, როგორც კი ერთგან წააგებს, დაიწყება ჯაჭვური რეაქცია და მოუწევს ძალაუფლების დათმობა. ამ არჩევნების პროგნოზირება ძალიან რთულია. მაგრამ დღეს ჩვენ, რომ ვისუაბროთ სანდრა რულოვსის უპერსპექტივობაზე, ასე ნამდვილად არ არის. როგორც ჩანს, მას საკმაოდ სერიოზული შანსები აქვს ამ არჩევნებში“- ამბობს გია ხუხაშვილი.

GSAC-ის დამფუძნებელი, ნოდარ ხარშილაძე „ნიუპოსტთან“ ამბობს, რომ ივანიშვილის გააქტიურება ძალაუფლებუს დაკარგვის შიშითაა გამოწვეული.

„ახლა ძალიან გაუჭირდა. ადრე თავს არ იწუხებდა, ტელევიზიით გამოსვლითაც კი. დღეს კი მან ჩათვალა, რომ საკუთარი რეიტინგი უნდა გამოიყენოს იმისთვის, რომ ხმები დაუბრუნოს ქართულ ოცნებას, რაც ძალიან რთული იქნება, რადგან ზედაპირზე ჩანს, რომ გულწრფელი არ არის ის, რასაც სამეგრელოში აკეთებს. ივანიშვილი ფულით ცდილობს ყველაფრის ყიდვას, რაც დაგვანახა. იმედი მაქვს, რომ ეს მეთოდი არ იმუშავებს. ხალხი ხვდება, რომ ბევრად მეტის ამოღებას აპირებს“ - უთხრა „ნიუპოსტს“ ხარშილაძემ.

ექსპერტი შუალედურ არჩევნებზე სანდრა რულოვსის შანსებზე საუბრობს.

„მას კარგი შანსები აქვს, გამომდინარე იქიდან, რომ „ნაციონალურ მოძრაობას“ ზუგდიდში ყიველთვის ძლიერი პოზიციები ჰქონდა, სანდრაც პოპულარული ფიგურაა“- დასძინა ნოდარ ხარშილაძემ.

ნიკა ჩიტიძეც იმ ექსპერტებს შორისაა, რომლებიც თვლიან, რომ ივანიშვილისთვის სამრეგრელოში გამარჯვება პრინციპული საკითხია.

„სამეგრელოში მიხეილ სააკაშვილი მაღალი პოლულარობით სარგებლობს. გავიხსენოთ 2016 წლის მოვლენები, როდესაც საარჩევნო ყუთებიც კი გაიტაცეს საარჩევნო უბნებიდან. ხელისუფლებამ სანდრა რულოვსის წინააღმდეგ მაშინ ძალის დემონსტრირებასაც არ მოერიდა. ბატონი ივანიშვილი დღეს ყველაფერს აკეთებს, რომ არ დათმოს სამეგრელო, რადგან ეშინია - ერთი პრეცენდენტი რომ დაფიქსირდეს სახელისუფლებო პარტიის დამარცხების, ამან შესაძლოა გარდამტეხი როლი ითამაშოს „ოცნების“ დასუსტებაში, რაც შედეგს გამოიღებს 2020 წლის არჩევნებზე და გავლენას იქონიებს მის დამარცხებაზე.

ამასთან, ივანიშვილი დარწმუნებულია, რომ თითქოს მას მაღალი ავტორიტეტი აქვს ხალხში. მის გარშემო შემოკრებილი მლიქვნელები არწმენებენ, რომ ის არის ნამდვილი ლიდერი. შეიძლება მას მისცეს რჩევა, რომ „ქართულ ოცნების“ კანდიდატს დაეხმაროს, რის შემდეგაც გავიდა ხალხში და შეხვდა მოსახლეობას. მოკლედ, განსაკუთრებით აშფოთებს სამეგრელოში გასამართი არჩევნები“- უთხრა „ნიუპოსტს“ ექსპერტმა.