ჰონგ-კონგის ბიზნეს სექტორის წარმომადგენლები ანაკლიის ღრმაწყლოვანი პორტითა და სპეციალური ეკონომიკური ზონით დაინტერესდნენ

ბიზნესი & ეკონომიკა - 19:40, 19 Mar, 2019

1258

19 მარტს თბილისში ანაკლიის ღრმაწყლოვანი პორტისა და სპეციალური ეკონომიკური ზონის შესახებ შეხვედრა ჰონგ-კონგიდან სტუმრად მყოფ 65-წევრიან დელეგაციასთან გაიმართა.

შეხვედრას ჰონგ-კონგის სპეციალური უმაღლესი რანგის დელეგაციის - ადმინისტრაციული რეგიონის მთავრობისა და ბიზნეს სექტორის წარმომადგენლები ესწრებოდნენ.

სხვა ოფიციალურ პირებთან ერთად შეხვედრას ესწრებოდა ჰონგ-კონგის სპეციალური ადმინისტრაციული რეგიონის ვაჭრობისა და ეკონომიკური განვითარების მდივანი ედუარდ იაუ, ასევე, „ანაკლიის განვითარების კონსორციუმის“ დამფუძნებლები, მამუკა ხაზარაძე და ბადრი ჯაფარიძე და „ანაკლია სითის“ დირექტორი ქეთი ბოჭორიშვილი.

ანაკლიის პორტისა და „ანაკლია სითის“ მენეჯმენტმა ანაკლიის პროექტების შესახებ პრეზენტაცია გამართეს. მათ მოწვეულ სტუმრებთან ერთად ღრმაწყლოვანი პორტისა და ქალაქ ანაკლიის პროექტები და მიმდინარე პროცესი დეტალურად განიხილეს.

მაღალი რანგის დელეგაციის მიზანი ჰონგ-კონგსა და საქართველოს შორის ბიზნეს-ურთიერთობების გაღრმავებაა, ასევე, აბრეშუმის გზის ინიციატივის „სარტყელი და გზა“ ფარგლებში პარტნიორობა. დელეგაცია 30 სხვადასხვა პროფესიული სექტორის წარმომადგენელს აერთიანებს. ჰონგ-კონგის სავაჭრო განვითარების საბჭოს (HKTDC) ბიზნეს-დელეგაცია საქართველოს რამდენიმე დღიანი ოფიციალური ვიზიტით სტუმრობს.

ანაკლიის ღრმაწყლოვანი პორტის პროექტის შესახებ ინტერესი ჰონგ-კონგის ბიზნესსექტორისა და სამთავრობო სტრუქტურების წარმომადგენლებმა ჯერ კიდევ 2019 წლის იანვარში გამოხატეს. ამავე პერიოდში დაიგეგმა საქართველოში ჰონგ-კონგის დელეგაციასთან სპეციალური შეხვედრაც ანაკლიის პორტთან დაკავშირებით.

„ანაკლია სითი“ უკვე თანამშრომლობს ჰონგ-კონგურ კომპანიასთან, მან აზიაში ყველაზე მსხვილ ლოგისტიკურ კომპანია „კერი ლოგისტიკასთან“ სტრატეგიული თანამშრომლობის ურთიერთგაგების მემორანდუმს გასულ წელს მოაწერა ხელი.

საქართველოსა და ჰონგ-კონგის სხვადასხვა სექტორის წარმომადგენლებს შორის პარტნიორობა განსაკუთრებით ორ პოლიტიკურ ერთეულს შორის თავისუფალი ვაჭრობის ხელშეკრულების ფარგლებში გააქტიურდა. ურთიერთობების გაღრმავება, ასევე, განსაკუთრებით მნიშვნელოვანია აბრეშუმის გზის დერეფნისა და ინიციატივა „სარტყელი და გზის“ განვითარების ფარგლებში, რომლის ერთ-ერთ მნიშვნელოვან რეგიონულ პროექტად ანაკლიის ღრმაწყლოვანი პორტი განიხილება.