სახელმწიფო აუდიტის სამსახურმა პრეზიდენტობის კანდიდატის, ნინო ბურჯანაძის პარტიის ოფისებთან დაკავშირებით ბრიფინგი გამართა და შესაბამისი განცხადება გაავრცელა. განცხადებაში ნათქვამია, რომ პარტია „დემოკრატიული მოძრაობა“ ოფისების რეალურ რაოდენობას მალავს:

„პრეზიდენტობის კანდიდატის, ქალბატონ ნინო ბურჯანაძის მიერ, გუშინ ტელეკომპანია „იმედში“ გაკეთებულ განცხადებასთან დაკავშირებით, გვსურს საზოგადოებას მივაწოდოთ სრული ინფორმაცია:

გაცნობებთ, რომ სახელმწიფო აუდიტის მიერ შესწავლილი იქნა პირველი სექტემბრის მდგომარეობით „დემოკრატიული მოძრაობის“ მიერ წარმოდგენილი დეკლარაცია, სადაც წრმოდგენილ იქნა მხოლოდ ერთი ოფისის იჯარა, მაშინ, როდესაც მათ ვებგვერდზე განთავსებული იყო დეტალური ინფორმაცია ცხრა ოფისის შესახებ. ამაზე დამატებითი ინფორმაციაც მოვითხოვეთ, რომელზე პასუხიც მათგან ვერ მივიღეთ.

აქვე აღვნიშნავთ, რომ წინასაარჩევნო კამპანიის პერიოდში, ქალბატონ ნინო ბურჯანაძის მიერ თითქმის ყველა რაიონში იხსნებოდა და იხსნება ოფისები და აღნიშნულის შესახებ ინფორმაციებს ვიღებთ საინფორმაციო საშუალებების დახმარებით.

აღნიშნულიდან გამომდინარე სამსახურის მიერ დაიწყო შემოვლა, რა დროსაც აღმოჩენილი და დასურათებული იქნა დაახლოებით 90 ოფისი. ხოლო პარტიის მიერ 13 სექტემბრის მდგომარეობით დეკლარირებული იქნა მხოლოდ 19 ოფისი.

ხსენებულის შედეგად მონიტორინგის სამსახურის მიერ 13 სექტემბრიდან დაიწყო გამოკითხვების ჩატარება და მხოლოდ და მხოლოდ სამსახურის მიერ ჩატარებული შემოწმების შედეგად, დეკლარირებული ოფისების რაოდენობა 73-მდე გაიზარდა, როგორც არაფულადი შემოწირულობა და წარმოდგენილ იქნა შესაბამისი დოკუმენტები.

ჩვენს მიერ დამატებით აღმოჩენილ ოფისებზე კი ექსპერტიზის ჩატარება იქნა მოთხოვნილი. რათა დადგინდეს პარტიის მიერ დამალული ოფისების საბაზრო ღირებულება, პარტიის მიერ გაღებული ხარჯის დადგენის მიზნით.

არცერთი პიროვნება და კანდიდატი არ დგას და არ უნდა თვლიდეს თავს კანონზე მაღლა მდგომად“, - განაცხადეს სახელმწიფო აუდიტის მიერ გამართულ ბრიფინგზე.