„შენით მოყვები გასაშავებელთა სიას თუ მე ჩამოვწერო...“ - ნოდარ მელაძის პასუხი კოკა ყანდიაშვილს

სოც.მედია - 14:09, 13 Mar, 2019

9945

ტელეკომპანია „რუსთავი 2“-ის საინფორმაციო სამსახურის უფროსი და „შაბათის კურიერის“ წამყვანი ნოდარ მელაძე სოციალურ ქსელში „რუსთავი 2“-ის იმ სიუჟეტზე წერს, რომლის მიხედვითაც ხელისუფლება ე.წ. ტროლების ქარხანის მეშვეობით პოლიტიკოსებისა და საზოგადოების აქტიური პირების შავ პიარ-კამპანიას ეწეოდა, აღნიშნულის ხელმძღვანელი კი კოკა ყანდიაშვილია.

ყანდიაშვილი რუსთავი 2-ის კამერას სიუჟეტის გაკეთების პროცესში ემალებოდა, ორი დღის შემდეგ კი პასუხების გაცემა Facebook-სტატუსებით დაიწყო, სადაც ის ტელეკომპანიას და ჟურნალისტ მარიამ გაფრიმდავილს შეურაცხმყოფელი სიტყვებით მიმართავდა.

ნოდარ მელაძე კოკა ყანდიაშვილს ეხმაურება და კითხვებზე პასუხების გაცემას ურჩევს:

„გადავავლე თვალი შენს პოსტებს, რუსთავი 2 ის ლანძღვით გსურს დაფარო, შენი "ტროლების ფაბრიკა" უკვე ძაან ზედმეტი მოგდის !!!!

ორ დღიანი დუმილის შემდეგ, რომ მოგცეს კურთხევა პასუხის გაცემის გავიგე, თუ სათქმელი გქონდა, რატომ არ უპასუხე ავტორის სატელეფონო ზარებს? პარტიის ოფისში, რომ დადიოდი, მარიამ გაფრინდაშვილი მეძებსო და იმალებოდი, რატომ იმალებოდი?

ახლა მიპასუხე, რა მიზნით იქირავე ოფისი რუსთაველის 12 - ში და რას საქმიანობდნენ ამ ოფისში?

ადამიანების სია, რომელიც გასაჯაროვდა, შენი ოფისის მიერ იყო გადაგზავნილი შენობის დაცვის სამსახურში. ეს ხალხი შენობაში შედიოდა და მუშაობდა, სად მუშაობდნენ?

თუ როგორც შენობის მფლობელს უთხარი, რომ ტურისტულ სააგენტოს ხსნიდი, აქ ტურები იყიდებოდა, სად ირიცხებოდა თანხა რომელსაც ტურების რეალიზების შედეგად იღებდი?

სად არის გადასახადები, რომელსაც მიღებული შემოსავლით ბიუჯეტში იხდიდი?

რომელ კომპანიაში იყვნენ დასაქმებულები ეს ადამიანები? თუ ეს ოფისი იყო ღია და ეწეოდი სამეწარმეო საქმიანობას უნდა გადაგეხადა 17 კაცის ხელფასის საშემოსავლო, წარმოადგინე დოკუმენტები!!!

არსებობენ მოწმეები, რომლებიც ყვებიან, როგორ იბარებდნენ ამ ოფისში და სამსახურს სთავაზობდნენ. ახლა შენით მოყვები დაფაზე ჩამოწერილი გასაშავებელი ადამიანების სიას თუ მე ჩამოვწერო, ის ხალხი ვის წინააღმდეგაც კამპანიას გეგმავდი. კარგი, დავიწყეთ, შენს ნაქირავებ ოფისში დაფაზე, მარკერით ჩამოწერილი გვარებიდან ერთ ერთი იყო TTako Charkviani ახლა მიპასუხე, ტურისტული სააგენტოს სახედ მოიაზრებდი თაკო ჩარკვიანს, თუ გიდობის შეთავაზება გინდოდა?“, - წერს ნოდარ მელაძე.