დასრულდა ორდღიანი სამუშაო შეხვედრები მარნეულის მუნიციპალიტეტში, რომელიც „საქართველოს ახალგაზრდა კონსტიტუციონალისტთა ასოციაციის“ ეგიდით, სსიპ „ბავშვთა და ახალგაზრდობის განვითარების ფონდის“ მიერ დაფინანსებული პროექტის „ახალგაზრდები კონსტიტუციური ცვლილებებისთვის“ ფარგლებში გაიმართა.

შეხვედრებზე მარნეულის მუნიციპალიტეტში მცხოვრებ ახალგაზრდებს მიეწოდათ ინფორმაცია ქართული კონსტიტუციონალიზმის თანამედროვე ტენდენციების შესახებ, რიგი კონსტიტუციურ-სამართლებრივი ინსტიტუტების საქმიანობის წესისა და უფლებამოსილებათა არეალის თაობაზე. გარდა ამისა, გაიმართა ღია დისკუსია, რომლის შედეგადაც ცნობილი გახდა ახალგაზრდების დამოკიდებულება ყველაზე მწვავე საკითხებთან დაკავშირებით, რომელიც დილემატურია ქართული კონსტიტუციონალიზმისთვის. მათ შორისაა: სახელმწიფოს მმართველობის მოდელი, ქვეყნის ტერიტორიული ორგანიზაცია, ადგილობრივი თვითმმართველობის სისტემის განვითარება და ა.შ. 

"საქართველოს ახალგაზრდა კონსტიტუციონალისტთა ასოციაცია“ უახლოეს მომავალში მსგავსი ტიპის შეხვედრებს დასავლეთ საქართველოშიც გამართავს. კერძოდ, მომავალ კვირაში ასოციაციის წევრები ზუგდიდსა და მესტიას ეწვევიან. ხოლო მოგვიანებით, მთელი ოქტომბრის განმავლობაში, პროექტში მონაწილეობას ბათუმში, ახალციხეში, გორში, თელავსა და ქუთაისში მცხოვრები ახალგაზრდებიც შეძლებენ.