„თავისუფლებისა და მხარდაჭერის ცენტრის“ დამფუძნებელი, ბაჩო ახალაიას მეუღლე ანი ნადარეიშვილი პროკურორ რევაზ ნადოის მიმართავს და სიფრთხილისკენ მოუწოდებს.

ანი ნადარეიშვილი აცხადებს, რომ რახან რევაზ ნადოი გამოიყენეს, „წულუკიან-კბილაშვილს“ უკანდასახევი გზა არა აქვთ“ და, შესაძლოა, დისკრედიტირებული პროკურორი თავიდან მოიშორონ. ანი ნადარეიშვილი რევაზ ნადოის მოუწოდებს, რომ გარეთ არ ისადილოს ხოლმე:

„ჩემი მიმართვა (გაფრთხილება) პროკურორ რეზო ნადოის

ბატონო პროკურორო, თქვენ ჩემზე კარგად იცით, რომ გაგწირეს და ხელები შეგაწმინდეს თქვენმა ხელმძღვანელობამ, პირველ რიგში, ჯერ იმიტომ რომ „კანონიერი ქურდების“ ინტერესების დამცველ პროკურორად მოგავლინეს, გაგაყალბებინეს უამრავი დოკუმენტი თუ მოწმის ჩვენება, ხანდაზმული მუხლით წაგაყენებინეს ბრალი, მერე ჩაგაგდეს უხერხულ მდგომარეობაში და გიბრძანეს, როგორც გინდა ისე გაჭიმე დრო და არჩევნებამდე სასამართლო პროცესი არ დაამთავროო, ყველანაირად ეცადეთ, მაგრამ არ გამოგივიდათ; 

ავად გაგხადეს და გუშინ ჯანმრთელი გამოგიჭირეთ (ეხლა ნახეთ ექიმს ყალბ ცნობას რომ დააწერინებენ თქვენი ჯანმრთელობის შესახებ იძულებით, მუქარით, შანტაჟით თუ როგორც იქნება, იმ ექიმის ლანდი გავხდები).

მე გულწრფელად მეცოდებით, იმიტომ რომ ადამიანური გრძნობები გამაჩნია, ის, რასაც გუშინ ვუყურე, როგორ გაიქეცით სახლში ჩემს დანახვაზე, როგორ იდექით კარის უკან და გვისმენდით ჩემი და თქვენი ქალიშვილის საუბარს მხოლოდ და მხოლოდ სიბრალულს იწვევს ჩემში. 

მე უბრალოდ გაფრთხილებთ, წულუკიან-კბილაშვილს უკან დასახევი გზა არა აქვთ, იმისათვის რომ ეს მთელი ცირკი "გააპრავონ" სრულიად შესაძლებელია, თქვენ მართლა რამე დაგმართონ (არჩევნები მოდის, ხომ გესმით) ამიტომ გირჩევთ უცხო ადამიანები, რომლებიც გუშინ მრავლად ტრიალებდნენ თქვენს სახლთან (კუდი, სუსი თუ რაც არის) არ მიიკაროთ, განსაკუთრებით კი ვითომ ვინმე ექიმი ინექციის ნემსით ხელში. P.S. ხოდა კიდევ, გარეთ არ ჭამოთ, განსაკუთრებით პროკურატურის სასადილოში და თქვენს კუთვნილ რესტორან "სამეფოში" მცხეთაში!“ - წერს „ფეისბუქზე" ანი ნადარეიშვილი.