ია ანთაძე, ვასილ მაღლაფერიძე და სააქციო საზოგადოების მიერ შესყიდვის გზით „მეცხრე არხისგან“ პოლიტიკური კონტროლისგან თავისუფალი ტელევიზიის შექმნის სხვა ინიციატორები დღეს პრემიერმინისტრ ბიძინა ივანიშვილს შეხვდნენ.

როგორც იდეის ერთერთი ავტორი ია ანთაძე აცხადებს, შეხვედრა ნაყოფიერი იყო და პრემიერმინისტრისგან მხარდაჭერის გარანტიაც მიიღეს:

„დღეს გვქონდა შეხვედრა პრემიერთან. შეხვედრა იყო ძალიან საქმიანი და ნაყოფიერი. შევთანხმდით, რომ ბატონი ბიძინა პრინციპულად თანახმაა ახალი ტელევიზიის შექმნაში მხარდაჭერაზე. შემდეგი კვირიდან კონკრეტულ თემებზე საუბარს ვაგრძელებთ "მეცხრე არხის" მფლობელების ორ წარმომადგენელთან.

გილოცავთ ყველას, ვინც ახალ ტელევიზიას გულშემატკივრობთ და თქვენი სახელით კიდევ ერთხელ ვუხდი მადლობას ბატონ ბიძინა ივანიშვილს იმ პოლიტიკური ნების გამოვლენისთვის, რომ ქვეყანაში იარსებოს სააქციო საზოგადოების კუთვნილმა (პოლიტიკური კონტროლისგან თავისუფალმა) ტელევიზიამ. დანარჩენი - ჩვენზეა“, - წერს ია ანთაძე.