დღეს დანიშნულ „საზოგადოებრივი მაუწყებლის“ სამეთვალყურეო საბჭოს სხდომას, სავარაუდოდ, ჟურნალისტები ეკა კვესიტაძე და დავით პაიჭაძე დაესწრებიან. 

განცხადება ჟურნალისტებმა უკვე შეიტანეს. თავად ბორდის სხდომა ახალ სეზონს და ახალი პროექტების განხილვას უკავშირდება. ბორდის სხდომაზე დასწრებას გეგმავენ ასევე არასამთავრობო ორგანიზაციები. 

ბორდის სხდომის პარალელურად, „საზოგადოებრივი მაუწყებლის“ შენობის წინ აქციის გამართვა დაანონსეს აგრეთვე გიორგი კორკოტაშვილმა და ირაკლი კაკაბაძემ, რომლებმაც მოსახლეობას მოუწოდეს, აქციას შეუერთდნენ. 

მათი კომენტარების მიხედვით, ეკა კვესიტაძე და დავით პაიჭაძე თავიანთი გადაცემების აღდგენის მიზნით ბორდის წევრებზე ზეწოლას ცდილობენ, თუმცა, თავად ჟურნალისტები აცხადებენ, რომ მათ ვერ მიიღეს საფუძვლიანი პასუხი გადაცემების დახურვასთან და არხიდან მათ გაშვებასთან დაკავშირებით. 

„საზოგადოებრივი მაუწყებელი“ არ არის რომელიღაც კერძო კომპანია, მან უნდა დაასაბუთოს თავისი გადაწყვეტილების სისწორე“, - აცხადებს ეკა კვესიტაძე, რომელიც დღის განმავლობაში, ბორდის სხდომის დაწყებამდე ევროკავშირის ქვეყნებისა და აშშ-ის ელჩს შეხვდება.