"წმინდა მამები ამბობენ, რომ ბოლოჟამიაო, ღმერთმა მოგცეთ ძალა, რომ ბოლო დღეები ავიტანოთ"

"წმინდა მამები ამბობენ, რომ ბოლოჟამიაო, ღმერთმა მოგცეთ ძალა, რომ ბოლო დღეები ავიტანოთ" - პატრიარქი

რელიგია - 18:25, 11 Feb, 2019

11238

სამების საკათედრო ტაძარში საკვირაო წირვა საქართველოს კათოლიკოს-პატრიარქმა ჩაატარა. ილია მეორემ პიროვნების განვითარებაზე ისაუბრა. მისი განცხადებით, ადამიანი მოწოდებულია, განვითარდეს. პატრიარქის განცხადებით, როდესაც ადამიანი განსაცდელის დროს ფიქრობს, რომ მას არაფერი ეშველება, სწორედ მაშინ მიდის ღმერთი მასთან. ილია მეორის თქმით, წმინდა მამები კი ამბობენ, რომ ბოლო ჟამის დღეები დგას. ამ დროს კი ადამიანმა ღვთის მადლი უნდა ეძიოს.

„ადამიანი სუსტია, მაგრამ არის ხატება ღვთისა; სუსტია, მაგრამ მსგავსებას ღვთისას უნდა მიაღწიოს თავისი მოღვაწეობით, თავისი სულიერი ცხოვრებით.

ადამიანი ადვილად ეცემა. (აი, საგალობელი რომ არის ,,დავიღალე, დავიღალე, მოდი ჩემთან უფალო“) ხანდახან ისე ეცემა, რომ ფიქრობს, ვეღარასდროს ადგება, მაგრამ ამ დროს მაცხოვარი თვითონ მიდის მასთან და აყენებს. ეს სასწაულია, ეს წყალობაა ღვთისა და ჩვენ ვმადლობთ უფალს, რომ გვაძლევს ამ წყალობას.
ამასთან ღმერთი ხედავს სურვილსაც და სურვილსაც მიაჩნევს როგორც გაკეთებულ საქმეს. ამიტომაც გულწრფელი სურვილიც კი უკვე ბევრს ნიშნავს. შეიძლება ვერ მიაღწიოს ადამიანმა სურვილის განხორციელებას, მაგრამ ღმერთი იმდენად მოწყალეა, რომ ამასაც გაკეთებულ საქმედ უთვლის.
როგორც ვთქვით, ადამიანი მოწოდებულია განვითარებისათვის, სრულყოფისათვის. მაცხოვარი ამბობს: ,,იყავით სრულყოფილნი ვითარცა მამათქვენი ზეციერი სრულყოფილ არს.“ ეს ნიშნავს იმას, რომ განვითარება დაუსრულებელია, მუდმივია, რადგან ადამიანი ვერასდროს მიაღწევს ისეთ სრულყოფას, როგორიც აქვს მამაზეციერს, ამიტომ ეს სიტყვები ნიშნავს უწყვეტ პროცესს აქაც და იქაც, ორთავ სოფელსა შინა.

ჩვენ ვცხოვრობთ განსაკუთრებულ დროს. წმინდა მამები ამბობენ, რომ ბოლო ჟამიაო და ზოგი იმასაც ამბობს, ბოლო დღეებიაო. ღმერთმა მოგვცეს ძალა და მადლი, რომ ავიტანოთ. რთულია ეს ბოლო ჟამი, მაგრამ ღმერთი ამოკლებს დროს. ღმერთი ამოკლებს დროს იმისათვის, რომ ნაკლებად დაიტანჯოს ადამიანი. ამიტომ არ უნდა შეგეშინდეთ, არ უნდა შეგვეშინდეს." - აღნიშნა პატრიარქმა.