ნადარეიშვილი - პატრულს პროკურორ ნადოის ჩუმად გაპარება სურდა

სამართალი - 00:16, 20 Sep, 2013

2420

შსს და თავდაცვის ყოფილი მინისტრის, ბაჩო ახალაიას მეუღლე ანი ნადარეიშვილი მიიჩნევს, რომ ბაჩო ახალაიას საქმის ყოფილი პროკურორი ცრუობდა როცა შეუძლოდ ყოფნის შესახებ განცხადება გაავრცელა. ნადარეიშვილი აღნიშნულის შესახებ სოციალურ ქსელში წერს. "მოკლედ მეგობრებო, მატყუარა პროკურორ რევაზ ნადოის (ვითომ შეუძლოდ რომ გახდა და პროცესებზე არ გამოცხადდა) მისამართი მოვიპოვე, დავადექით სახლში და გარეთ დაგვხვდა შორტებით და შლოპანცებით პორშეს ათვალიერებდა (ალბათ იმდენი პრემია მიიღო ყიდვას აპირებს), როგორც კი დაგვინახა ეგრევე ვირთხასავით შეძვრა სახლში, გამოვიდა ვიღაც ქალი და წნევა აქვს და ცუდად არის, ფეხზე ვერ დგებაო. აბა ეს ვინ იყო მეთქი, მისი ძმა იყოოო :)))) უცებ მოვიდა 5 პატრულის მანქანა და 4 ოპერატიული დაბურული მინებით, მიაყენეს სახლთან, უნდოდათ გაეპარებინათ, მივადექი ვიდეო კამერით, უცებ პატრული იძახის ახალაიას ცოლი მოდისო და ჩახტა ყველა მანქანაში და გაიქცა", - წერს "ფეისბუქზე" ანი ნადარეიშვილი.
შეგახსენებთ, რომ პროკურორ ნადოის ჯანმრთელობის მდგომარეობასთან დაკავშირებით განცხადება დღეს მთავარმა პროკურატურამაც გაავრცელა: "პროკურორ რეზო ნადოის სასამართლო პროცესებზე გამოუცხადებლობის ფაქტთან დაკავშირებით განვმარტავთ, რომ უკანასკნელ პერიოდში ჯანმრთელობის მდგომარეობის გაუარესების გამო, პროკურორი რეზო ნადოი თავს შეუძლოდ გრძნობდა, რის გამოც ვერ დაესწრო 17 სექტემბერს ჩანიშნულ სხდომას.
მიუხედავად აღნიშნულისა, 2013 წლის 18 სექტემბერს რეზო ნადოი გამოცხადდა სამსახურში, თუმცა კვლავ შეუძლოდ იგრძნო თავი, რის გამოც დასჭირდა სასწრაფო სამედიცინო დახმარება და დღეის მდგომარეობით, ექიმის რჩევით იმყოფება ბიულეტენზე. პროკურორის ჯანმრთელობის გაუარესების გამო, სასამართლო განხილვების გაჭიანურების თავიდან ასაცილებლად, იმ სისხლის სამართლის საქმეებზე, რომელზეც რეზო ნადოი მხარს უჭერდა სახელმწიფო ბრალდებას, ჩაერთო სხვა პროკურორი, რითაც უზრუნველყოფილ იქნება გონივრულ ვადებში სასამართლო განხილვის დასრულება", - ნათქვამია მთავარი პროკურატურის მიერ გავრცელებულ განცხადებაში.