საქართველოს შს სამინისტრომ კოდექსში შეტანილი ფრაზის - "საზოგადოებრივი ზნეობის შეურაცხმყოფელ მდგომარეობაში ყოფნა" მნიშვნელობა განმარტა და ამ მიმართულებით "ადმინისტრაციულ სამართალდარღვევთა კოდექსში" დაგეგმილ ცვლილებებში დამატებითი დაზუსტებები შეიტანა. კოდექსის 171-ე მუხლში იქნება ჩანაწერი:

"საზოგადოებრივ ადგილებში ადამიანის ღირსებისა და საზოგადოების ზნეობის შეურაცხმყოფელი ქმედების განხორციელება", რაშიც იგულისხმება: სექსუალური ხასიათის ქცევა, საზოგადოებრივ ადგილებში სრული ან ნაწილობრივი უხამსი გაშიშვლება, ფიზიოლოგიური მოთხოვნილებების დაკმაყოფილება. შესაბამისი განმარტება "ადმინისტრაციულ სამართალდარღვეთა კოდექსის" ამ ნაწილთან დაკავშირებით, შსს-ს მინისტრის მოადგილემ ლევან იზორიამ დღეს პარლამენტში, იურიდიულ საკითხთა კომიტეტის სხდომაზე გააკეთა. იზორიას თქმით, მსგავსი ქმედებები პირველ შემთხვევაში გაფრთხილებას გამოიწვევს, თუმცა მისივე განმარტებით, გააჩნია ასეთი ქმედების ზომასა და ხარისხს, რაც იმას ნიშნავს, რომ საზოგადოებრივ ადგილებში ადამიანის ღირსებისა და საზოგადოების ზნეობის შეურაცხმყოფელი ქმედების განხორციელება შეიძლება 200-ლარიანი ჯარიმის საფუძველი გახდეს.

გარდა ამისა, შსს-მ კანონპროექტში შეცვალა 171-ე მუხლის ის ნაწილიც, რომელიც საზოგადოებრივ ადგილებში ალკოჰოლური სასმელების მიღებაზე ჯარიმის დაკისრებას ითვალისწინებს. "მაგალითად ეს დასჯადი არ იქნება იქ, სადაც ლუდის ჩამოსხმა ხდება" - აღნიშნა მინისტრის მოადგილემ.

რაც შეეხება სახდელის ზომას, შსს-ს მიერ კორექტირებული პროექტის თანახმად, ეს პირველ რიგში - გართხილებას, ასევე 200 ლარით დაჯარიმებას გამოიწვევს.