აჭარის მთავრობის თამჯდომარემ არჩილ ხაბაძემ, საქართველოს რეგიონული განვითარებისა და ინფრასტრუქტურის მინისტრის მოადგილემ შოთა მურღულიამ და გზების დეპარტამენტის უფროსმა დავით შავლიაშვილმა ხელვაჩაურში გზის კეთილმოწყობით სამუშაოები მოინახულეს.

ავტოტრანსპორტის მოძრაობის უსაფრთხოების გაუმჯობესების მიზნით ამჟამად გადაუდებელი სამუშაოები ხორციელდება ბათუმი-ახალციხის გზის ბათუმი-ხულოს მონაკვეთზე. „ჩვენ დაახლოებით ორი თვის წინ დავპირდით მოსახლეობას, რომ აღნიშნული პროექტი განხორციელდებოდა. პროექტის განხორციელება დაიწყო 3 სექტემბერს და 31 დეკემბრისთვის უნდა დასრულდეს.

გზებზე კეთდება შერეული ტიპის - ხის და ქვის ჯებირები, ასევე იქნება დამცავი ჯებირები და თუნუქის ფურცლებით დამზადებული ამრიდები. მინდა გითხრთ, რომ ბოლო სამი წლის განმავლობაში დაახლოებით 22 პიროვნება დაიღუპა ავტოსატრანსპორტო შემთხვევის შედეგად. ჩვენ მაქსიმალურად ვეცდებით, რომ ეს მინიმუმამდე იყოს დაყვანილი. დონორების დახმარებით მომავალი წლიდან დაიწყება პროექტი, რომელიც ხულო-გოდერძის უღელტეხილის მიმართულებით უზრუნველყოფს მსგავსი ჯებირების მოწყობას,“ - განაცხადა არჩილ ხაბაძემ.

ცნობისათვის, წლების განმავლობაში გზის ეს მონაკვეთი ყველაზე სახიფათო იყო ავტოტრანსპორტის გადაადგილებისთვის. მხოლოდ 2011-2013 წლების მონაცემებით 17 ავტოსაგზაო შემთხვევა მოხდა, რასაც 22 ადამიანი ემსხვერპლა. გადაუდებელი სამუშაოების ფარგლებში გზის გასწვრივ 9700 გრძ.მ რკინა-ბეტონის პარაპეტები, 21 500 გრძ.მ ბაგირისა და 6500 გრძ.მ ლითონის ზრუდარები გაკეთდება. ასევე 1500 მ სიგრძის გზის ქვედა საყრდენი კედლები მოეწყობა. პროექტის საორიენტაციო ღირებულება 4 000 000 ლარია.

დღესვე არჩილ ხაბაძემ, შოთა მურღულიამ და დავით შავლიაშვილმა სარფის გზის მონაკვეთზე მიმდინარე გაწმენდითი სამუშაოები მოინახულეს. სარფი-სენაკი-ფოთის მონაკვეთზე, რომელიც 57 ათას კვადრატულ მეტრს მოიცავს, მიმდინარეობს გაწმენდითი სამუშაოები. გზები იწმინდება კლდის მცოცავი ნაწილებისაგან.

გზებზე მოეწყობა დამცავი ბადეები, რომელიც გაცილებით უსაფრთხოს გახდის მოძრაობას. ამ ეტაპისთვის, სამუშაოებისთვის გამოყოფილია 1 771 000 ლარი. სამუშაოები 12 აგვისტოდან დაიწყო და მიმდინარე წლის 15 დეკემბრამდე დასრულდება.