„ელისო კილაძე ვინ არის, საერთოდ არ ვიცი. ძალიან მაინტერესებს, რა უფლებით გამოაქვეყნა და ვინ მისცა ეს სურათები. მეორე სურათზე ხელი რომ არის, ის ჩემი ხელია, მე მიჭირავს ხელი.“- ამბობს ღუდუშაურის სახელობის ეროვნული სამედიცინო ცენტრის ანგიოქირურგი და მიკროქირურგი ჯემალ ჯიქიძე ,,გურია ნიუსთან“ ინტერვიუში.

ჯიქიძე აცხადებს, რომ ოპერაციას მის გარდა რამდენიმე ექიმიც ესწრებოდა, პაციენტი 18 წლამდე ასაკის ბიჭი იყო ხარაგაულის რაიონიდან და არ იყო პატიმარი. 

,,ყველაზე უკეთესი, იცით, რა იქნება? ადმინისტრაციაში მიხვიდეთ მთავარ ექიმთან, ისტორია ამოიღოთ და ზუსტ ინფორმაციას მიიღებთ. ერთი წლის ამბავზე მე რა უნდა გითხრა, შვილო. ოპერაცია მარტო მე კი არ გამიკეთებია. სამი კაცი თუ ოთხი კაცი ვიყავით. პატარა ბავშვი რომ იყო, მახსოვს. ალბათ 17 ან 18 წლის. ხარაგაულის რაიონიდან, სახლში მოუვიდა, მამამისთან ერთად შემოიყვანეს. 

ხელი ჰქონდა მოკვეთილი. აღსდგა ის ხელი, მაგრამ დანარჩენზე ის პატარა ბავშვი უნდა ნახოთ. უნდა დაელაპარაკოთ. ფაქტია, პატიმარი არ ყოფილა. პატიმარს ასე როგორ მოიყვანდნენ. ელისო კილაძე ვინ არის, საერთოდ არ ვიცი. ძალიან მაინტერესებს, რა უფლებით გამოაქვეყნა და ვინ მისცა ეს სურათები. 

პირადად მე, არ მაქვს ეს სურათები. მეორე სურათზე ხელი რომ არის, ის ჩემი ხელია, მე მიჭირავს ხელი. ვინ მისცა ეს სურათები, რა მიზეზით და რა მიზნით. ეს საშინელებაა. ასე არ შეიძლება." - განაცხადა "გურია ნიუსთან" ჯიქიძემ.