ჟურნალისტებმა ეკა კვესიტაძემ და დავით პაიჭაძემ დღეს „საზოგადოებრივ მაუწყებელში“ ბრიფინგი გამართეს, რომელიც „სამოქალაქო ალიანსის“ წარმომადგენლებმა გია კორკოტაშვილმა და ირაკლი კაკაბაძემ ჩაშალეს.

მანამდე, სანამ კორკოტაშვილი და კაკაბაძე ბრიფინგის დარბაზში შევიდოდნენ, ჟურნალისტებმა ბრიფინგზე წარადგინეს ბრძანება, რომელსაც ხელს აწერს გენერალური დირექტორის მოვალეობის შემსრულებელი თამაზ ტყემალაძე და რომლის თანახმადაც, ეკა კვესიტაძე „საზოგადოებრივი მაუწყებლის“ ჟურნალისტი აღარაა და მას კონტრაქტი შეუწყვიტეს.

გია კორკოტაშვილმა ბრიფინგის დარბაზში განაცხადა, რომ ეკა კვესიტაძე და დავით პაიჭაძე წლების განმავლობაში წამლავდნენ საზოგადოებას: 

„ახლა სხვა დროს და სხვა შეგნებითაა ხალხი, საკმარისია უკვე, ეს ჟურნალისტები უნდა წავიდნენ „საზოგადოებრივი მაუწყებლიდან“ და კერძო ტელევიზიებში აკეთონ, რაც უნდათ, სადაც მიუწვდებათ ხელი“, - განაცხადა გია კორკოტაშვილმა.

„საზოგადოებრივი მაუწყებლის“ წინ ჟურნალისტების მხარდასაჭერად მემარცხენე ორგანიზაციებიც შეიკრიბნენ.