ევროპარლამენტარების კრიტიკა საპრეზიდენტო არჩევნებს - "ხელისუფლება არაფრის შეცვლას არ აპირებს, თუ არ დააძალეს"

პოზიცია - 15:29, 22 Jan, 2019

1417

სტრატეგიული ანალიზის ცენტრის (GSAC) დამფუძნებელი ნოდარ ხარშილაძე მიიჩნევს, რომ „ქართული ოცნება“ საარჩევნო სისტემის ცვლილებას არ აპირებს, თუ ეს საერთაშორისო თანამეგობრობამ არ აიძულა.

ექსპერტი „ნიუპოსტთან“ ამბობს, რომ ევროსაბჭოს დეპუტატების მიერ საქართველოში ჩატარებულ საპრეზიდენტო არჩევნების მკვეთრად უარყოფითი შეფასება საქართველოს სახელმწიფოსთვის კარგია, თუმცა მსგავსი შეფასებები მმართველი ხელისუფლებისთვის მკვეთრად უარყოფითია.

ამასთან ხარშილაძის თქმით, საერთაშორისო ასპარეზზე არავის სჯერა „ქართული ოცნების“ განცხადებების, რომ მათ საერთაშორისო დამკვირვებლების კრიტიკა მიიღეს, გაიზიარეს და გაკვეთილები ისწავლეს.

"ჩუგოშვილის განცხადება ვნახეთ, რომელმაც თქვა, რომ ძირითადად ყველაფერი კარგად იყო, პატარა შეცდომები იყო, მაგრამ ჩვენ გაკვეთილები ვისწავლეთო. თუმცა რა ისწავლეს, ეს არის საკითხავი. არჩევნების შემდეგ უფრო დაიწყო პოლიტიკური დევნა, ის ამბები, რაც პრეზიდენტის ინაუგურაციის დღეს მოხდა. ამასთან, ერთად ქალბატონი ჟვანია დატოვეს ცესკოს თავმჯდომარედ. ასე რომ, არავინ დაიჯერებს, რომ ამათმა რამე ისწავლეს.

ხელისუფლების მცდელობა, არჩევნები სამართლიანად და კონკურენტუნარიანად შეფასდეს, მიგვანიშნებს იმაზე, რომ მათ არავითარი ცვლილებების განხორციელება არ სურთ, თუ რა თქმა უნდა, ძალიან არ დააძალეს.

ჩემი აზრით, რაც ხდება ქართული სახელმწიფოსთვის პოზიტიურია, ხოლო "ქართული ოცნებისთვის" მკვეთრად ნეგატიურია. ძალიან მნიშვნელოვანია, რომ გარე და შიდა ფაქტორების ერთობლიობამ აიძულოს საქართველოს ხელისუფლება, შეცვალოს არამხოლოდ საარჩევნო კოდექსი და სისტემა, არამედ საერთოდ არჩევნებისადმი მიდგომა. საქართველოში აღარ უნდა იყოს აღქმა, რომ არჩევნები ეს არის საკუთარ ჯიბეზე მიბმული სისტემა.

საბოლოო ჯამში, რა პატარა დათმობებზე არ უნდა წავიდეს ხელისუფლება, თუ მთლიანად სისტემა არ შეიცვალა, ამას დიდი ეფექტი ქვეყნის განვითარებაზე არ ექნება"- განაცხადა ნოდარ ხარშილაძემ.

ცნობისთვის, სტრასბურგში მიმდინარე ევროსაბჭოს საპარლამენტო ასამბლეაზე. ევროსაბჭოს დეპუტატებმა საპრეზიდენტო არჩევნებზე გამოვლენილ დარღვევებზე ისაუბრეს.

უცხოელმა მაღალჩინოსნებმა საპრეზიდენტო არჩევნებისას ადმინისტრაციული რესურსის გამოყენებაზე, ამომრჩევლის მოსყიდვაზე, ვალების განულების პროგრამასა და ამომრჩევლის ნების კონტროლზე ღიად ისაუბრეს.

ევროსაბჭოს დეპუტატები სვამენ კითხვას - ჰქონდა თუ არა ამომრჩეველს თავისუფალი არჩევანის გაკეთების საშუალება.