„საზოგადოებრივი მაუწყებლის“ გენერალური დირექტორის მოვალეობის შემსრულებელმა თამაზ ტყემალაძემ ჟურნალისტებს ეკა კვესიტაძესა და დავით პაიჭაძეს უპასუხა და განაცხადა, რომ მასთან ურთიერთობის გასარკვევად „დამატებითი ადამიანების ჩარევა“ საჭირო არ იყო.

„პირველ რადიოსთან“ საუბარში თამაზ ტყემალაძე აცხადებს:

„მე ისედაც შევხვდებოდი ამათ, თუ ჰქონდათ ამის სურვილი. დამატებითი ადამიანების ჩარევის გარეშეც. რა, ვიმალები სადმე თუ არა მაქვს იმის უფლება, რაც გავაკეთე? რა, დავარღვიე კოდექსი თუ რა? კი ბატონო, არის სასამართლო, არის სახელმწიფო და თუ მე დავარღვიე რამე, მითხრან და წავალ ჩაის საკრეფად. 

მე ჯერ ხელი არ მომიწერია გადაწყვეტილებისთვის და როდესაც ამ დადგენილებას გავატარებთ კანცელარიაში, მაშინ გაგცემთ პასუხს, საერთოდ გავა თუ არა ეს გადაცემები ეთერში“, – ამბობს ტყემალაძე.

შეგახსენებთ, რომ ეკა კვესიტაძემ და დავით პაიჭაძემ, რომლებიც დღეს „საზოგადოებრივი მაუწყებლის“ შენობაში არ შეუშვეს, თამაზ ტყემალაძეს მიმართვა გაუგზავნეს და იმის გარკვევა მოითხოვეს, გავა თუ არა განახლებული სეზონიდან ეთერში „აქცენტები“ და „დიალოგი დავით პაიჭაძესთან“.