„საზოგადოებრივი მაუწყებელი“ ახალ სეზონს ეკა კვესიტაძისა და დავით პაიჭაძის გადაცემების გარეშე დაიწყებს, საზმაუში მისული ჟურნალისტები კი, რომლებიც ჯერჯერობით ტელევიზიის მოქმედი თანამშრომლები არიან და მათ გათავისუფლებაზე ინფორმაცია არ ვრცელდება, შენობაში არ შეუშვეს.

 კვესიტაძეს დაცვის წევრებმა განუცხადეს, რომ მათ აქვთ თამაზ ტყემალაძის ბრძანება აღნიშნული ჟურნალისტების საშვების დაბლოკვასთან დაკავშირებით.

ტელევიზიაში მისულმა კვესიტაძემ შენობაში შესვლა ერთჯერადი საშვით შეძლო. მას ტყემალაძესთან საუბარი და მისი გადაწყვეტილების მიზეზის გარკვევა სურდა. თუმცა, ტყემალაძის კაბინეტის ორივე შესასვლელი ჩაკეტილი დახვდა.

 „შესვლა მსურდა იმისათვის, რომ გამერკვია, თუმცა კარი შიგნიდან აქვს ჩაკეტილი და კაბინეტში ზის“, - განაცხადა კვესიტაძემ.

დღეს გავრცელებული ინფორმაციის თანახმად, ეკა კვესიტაძისა და დავით პაიჭაძის გადაცემების, „აქცენტებისა“ და „დიალოგი დავით პაიჭაძესთან“, დახურვის საბოლოო გადაწყვეტილება თამაზ ტყემალაძეს ჯერჯერობით არ მიუღია.