17 იანვარს, პარიზის დროით საღამოს 8 საათზე Grande galerie de l’évolution-ში Vetements-ის 2020 წლის შემოდგომა/ზამთრის კოლექციის „Anti-social“ ჩვენება გაიმართა. ჩვენებაზე მოსაწვევი ძველებური ორცხობილის შეფუთვაში იყო, რომელსაც თან ორცხობილა ახლდა.

კოლექციაში, რომელიც ცხოველებით გაფორმებულ დარბაზში ჩატარდა, იყო ყველაფერი: სტივ ჯობსის გაცოცხლებული სტილი, ღორის გრიპი, თავდაბურული ქალები, სმარტფონებზე დამოკიდებული ახალგაზრდების მარტოობა, საპრეზიდენტო არჩევნები და მოდაზე დამოკიდებულებისადმი ირონია...

კოლექციის ჩვენება გახსნა სტივ ჯობსის სტილში გამოწყობილმა მოდელმა, რომლის სამოსზეც იყო წარწერა: „გაფრთხილება: რის ნახვასაც აპირებთ, შეგაწუხებთ. კაცობრიობას აქვს ბნელი მხარე, რომლის დანახვის საშუალებასაც ცენზორები არ გაძლევენ, მაგრამ ჩვენ განახებთ. ამის ნახვა მხოლოდ თქვენი რისკია.“

როგორც vogue-ი წერს კოლექცია აჯანყებული ბავშვების ჩაცმულობას გავდა, ამოტრიალებული ანარქიის სიმბოლოები, ამობრუნებული სამოსი, შეცდომებით, თუმცა მაინც ცნობადი კორპორატიული ლოგოტიპები, ინტერპოლის ყალბი ნიშანი, რომელიც რუსულს ჰგავს. „დამზადებულია ევროპაში“ დაბეჭდილი იყო შარვალზე, რომელიც ამერიკის საპატიმროების სამოსს გავდა.

გვასალიას თქმით, იდეა, სადაც სმარტფონიანი მოდელი თავის სამოსშია ჩამალული, საკუთარი ცხოვრებიდან დაებადა:

„მე გავაცნობიერე, რომ აქ არ არსებობს პირადი ცხოვრება, როდესაც ვარ საზოგადოებრივ ტრანსპორტში და ჩემს ტელეფონში ვმუშაობ, ხშირად ვხედავ რომ ადამიანები მაში იყურებიან ან ფოტოებს მიღებენ“ - განაცხადა გვასალიამ.

მისი სამოსი სწორედ საზოგადეობის მხრიდან თვალთვალის და სახის ამომცნობი ტექნოლოგიების შიშის გამოხატულებაა.