„საზოგადოებრივი მაუწყებლის“ ჟურნალისტები ეკა კვესიტაძე და დავით პაიჭაძე ერთობლივ განცხადებას „ფეისბუქის“ მეშვეობით ავრცელებენ და საზმაუს სამეურვეო საბჭოს თავმჯდომარეს ემზარ გოგუაძეს მიმართავენ, უზრუნველყოს მათი შეხვედრა გენერალური დირექტორის მოვალეობის შემსრულებელთან, ამ ჟურნალისტების გადაცემებთან დაკავშირებული გაურკვევლობის გამო.

განცხადების ბოლოს ნათქვამია ასევე, რომ ხვალ, 15 საათზე, „საზოგადოებრივ მაუწყებელში“ ეკა კვესიტაძე და დავით პაიჭაძე ბრიფინგს გამართავენ.

„ნიუპოსტი“ ჟურნალისტების ერთობლივ განცხადებას გთავაზობთ:

"ბატონო ემზარ, მოგმართავთ, რათა სამეურვეო საბჭოს უახლოეს სხდომაზე, პარასკევს, 20 სექტემბერს, უზრუნველყოთ ჩვენი დასწრება და შეხვედრა საზოგადოებრივი მაუწყებლის გენერალური დირექტორის მოვალეობის შემსრულებელთან, თამაზ ტყემალაძესთან. აღნიშნული მოთხოვნა განპირობებულია შემდეგი მიზეზით: ჩვენს გადაცემებთან („აქცენტები“ და „დიალოგი დავით პაიჭაძესთან“) დაკავშირებული გაურკვევლობა რამდენიმე კვირაა გრძელდება. 

მაუწყებლის ხელმძღვანელობა პერიოდულად, სხვადასხვა მედია საშუალებასთან საუბრისას ავრცელებს ინფორმაციას ხსენებული ორი გადაცემის შესახებ და ამავე დროს არ გვხვდება გადაცემის ავტორებს სამომავლო განზრახვებზე, შეთავაზებებსა თუ გადაწყვეტილებებზე სალაპარაკოდ. გენერალური დირექტორის მოვალეობის შემსრულებელი აცხადებს, რომ კვესიტაძე და პაიჭაძე მიუკერძებლად ვერ შეძლებენ გადაცემათა წაყვანას და ამ მიდგომას საფუძვლად უდებს გადაწყვეტილებას ჩვენი გადაცემების დახურვის შესახებ.

გთხოვთ, ხელი შეუწყოთ ჩვენს შეხვედრას, რათა საჯაროდ წარმოჩინდეს ის არგუმენტები და შეკითხვები, რაც ჩვენ გვაქვს ბატონ ტყემალაძესთან. პატივისცემით, ეკა კვესიტაძე, დავით პაიჭაძე 17 სექტემბერი, 2013.წ. ეს უკვე საბჭოსადმი მიმართვაში არ შედის, მაგრამ გატყობინებთ: ხვალ, 15 საათზე, საზოგადოებრივ მაუწყებელში ეკა კვესიტაძე და მე ვმართავთ ბრიფინგს ამ თემაზე",-ნათქვამია ერთობლივ განცხადებაში.