სოფელ დიცთან ოკუპირებულ ტერიტორიაზე საქართველოს შს სამინისტროს ანალიტიკური დეპარტამენტის წარმომადგენლებსა და ოსურ მხარეს შორის მოლაპარაკება გაიმართა, თუმცა, კონკრეტულ შედეგს ვერ მიაღწიეს. შეხვედრის შემდეგ ოსურმა მხარემ კომენტარი არ გააკეთა. 

რაც შეეხება შს სამინისტროს ანალიტიკურ დეპარტამენტს, აღნიშნული უწყების ხელმძღვანელის მოადგილე კახა ქემოკლიძე აცხადებს, რომ კონკრეტული შედეგი მიღწეული არ არის და რუსი სამხედროები ე.წ. სასაზღვრო სადემარკაციო სამუშაოების წარმოებას კვლავ გააგრძელებენ. 

თუმცა, ქემოკლიძე იმასაც ამბობს, რომ სოფლის განაპირას არსებული სასაფლაო ოსური მხარის კონტროლირებად ტერიტორიაზე აღარ მოექცევა. ამ გადაწყვეტილებამ საზოგადოებაში უკმაყოფილება გამოიწვია, რადგან ქართული მხარის კონტროლს აღარ დაექვემდებარება აღნიშნულ სასაფლაოსთან მისასვლელი გზა, შესაბამისად, მათი თქმით, აზრს კარგავს სასაფლაო მოექცევა თუ არა რუსი სამხედროების მიერ გავლებული ლითონის ბადეების მიღმა. 

გარდა ამისა, ანალიტიკური დეპარტამენტის ხელმძღვანელის მოადგილის თქმით, ჯერჯერობით ოსურ მხარეს კონკრეტული პასუხი არ გაუცია, რა ბედი ელის ქართველების იმ სამ საცხოვრებელ სახლს, რომელიც ამ ე.წ. საზღვრის პერიმეტრზე მდებარეობს. დიცში ჩავიდა შიდა ქართლის გუბერნატორი ზურაბ ჩხეიძე, რომელიც ევროკავშირის სადამკვირვებლო მისიის გორის ოფისის ხელმძღვანელს ესაუბრა და სთხოვა, რომ საერთაშორისო საზოგადოების ფართო განხილვის საგანი გახდეს და ინფორმაცია მიეწოდოს ყველა საერთაშორისო ორგანიზაციას დიცში არსებული მდგომარეობაზე და დღეს მომხდარ ინციდენტთან დაკავშირებით. 

მთელი დღის განმავლობაში ევროკავშირის სადამკვირვებლო მისიის მონიტორები იმყოფებოდნენ შემთხვევის ადგილზე და მართალია კომენტარი არ გაუკეთებიათ, თუმცა თავიანთ ანგარიშში აღნიშნულ ფაქტთან დაკავშირებით მოგვიანებით განაცხადეს.

შენიშვნა: "ნეტგაზეთის" ფოტო.