მოსამართლეთა სკანდალურ სიას მმართველი გუნდი იუსტიციის საბჭოს უკან არ დაუბრუნებს

მოსამართლეთა სკანდალურ სიას მმართველი გუნდი იუსტიციის საბჭოს უკან არ დაუბრუნებს - განხეთქილება „ქართულ ოცნებაში“ გრძელდება

პოზიცია - 12:31, 08 Jan, 2019

1971

მოსამართლეების სიას მმართველი გუნდი იუსტიციის საბჭოს უკან არ დაუბრუნებს. მამუკა მდინარაძე ამბობს, რომ იუსტიციის საბჭომ სია კანონის სრული დაცვით შეადგინა და პარლამენტს გადაუგზავნა. დეპუტატის თქმით, შესაძლოა სიაში მოხვედრილი მოსამართლეების ნაწილი თავად მმართველი გუნდისთვისაც მიუღებელი იყოს, თუმცა, ამის მიუხედავად, საკანონმდებლო ორგანომ მსჯელობა უნდა დაიწყოს.

„10-კაციან სიაში პეტრე შეიძლება მისაღები იყოს, პავლე შეიძლება მიუღებელი იყოს. განხილვა, რა თქმა უნდა, დაიწყება ნებისმიერ სიასთან დაკავშირებით, რომელიც პარლამენტში იქნება წარმოდგენილი. ამასობაში ჩვენ თუ შევიმუშავებთ და არის ამაზე საუბარი, დრო ამისთვის ავიღეთ და კიდევ უფრო დეტალიზირება უნდა მოხდეს რაღაც პროცედურის, რაღაც კრიტერიუმის, ეს კი ბატონო, სამსჯელო თემა არის, მაგრამ დღევანდელი მოცემულობით, რაც გვაქვს კონსტიტუციაში, ჩვენ ამ მოცემულობით, კანონის პრობლემა, საკანონმდებლო პრობლემა, ნორმისმიერი პრობლემა. ვთქვათ სიასთან დაკავშირებით არ ყოფილა, ისე შემოიტანეს სია,“ - განაცხადა მამუკა მდინარაძემ.

10-კაციანი სიის უკან გაწვევას არც იუსტიციის საბჭო გეგმავს. იუსტიციის უმაღლესმა საბჭომ უზენაესი სასამართლოს მოსამართლეთა კანდიდატები 2018 წლის 24 დეკემბერს დაასახელა. ათკაციან სიაში შედიან : მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე, გიორგი მიქაუტაძე.

აღნიშნულ სიას მმართველ გუნდში განხეთქილება მოჰყვა. ეკა ბესელიასთან ერთად მისი რამდენიმე თანამოაზრე გუნდის ნაწილს დაუპირისპირდა. ბესელიამ იურიდიულ საკითხთა კომიტეტის თავმჯდომარის თანამდებობა დატოვა. ის არ გამორიცხავს, რომ სკანდალური სიის დამტკიცების შემთხვევაში პარტიაც დატოვოს. ვრცელდება ინფორმაცია, რომ ბესელია შესაძლოა თავად პარტიის ხელმძღვანელობამ გარიცხოს საკუარი რიგებიდან.

ეკა ბესელიას თანამოაზრეა გედევან ფოფხაძე, რომელიც აცხადებს, რომ ადამიანები, რომლებიც უზენაესი სასამართლოს მოსამართლეების არსებულ სიას მხარს დაუჭერენ, ავტომატურად შევლენ კონფლიქტში საზოგადოებასთან. მისი თქმით, მთავარ პრიორიტეტად ისევ საკანონმდებლო ორგანოდან მოსამართლეთა სიის გაწვევა რჩება.