„მისი უწმინდესობა პატრიარქიც კი შეაწუხეს და ორი თხოვნა გამოატანეს, იქნებ, ჰესები არ ავაშენოთო, მაგრამ მე დავარწმუნე ის და ვთხოვე, პირიქით, მხარი დაეჭირა“, - ამის შესახებ საქართველოს პრემიერმინისტრმა ბიძინა ივანიშვილმა შუახევში, ჰესის მშენებლობის გახსნის დროს სიტყვით გამოსვლისას განაცხადა.

მისი თქმით, ჰესების მშენებლობის საკითხს თითოეული მოსახლე, მათ შორის ის სვანებიც, რომლებიც უკმაყოფილებას გამოთქვამენ „ხუდონჰესის“ მშენებლობის გამო, გაგებით უნდა მოეკიდონ:

„მე პარასკევს მოწვეული მყავდა მისი უწმინდესობა პატრიარქი და პატრიარქიც კი შეაწუხეს და ორი თხოვნა გამოატანეს, რომ ჰესი არ აგვეშენებინა ორ ადგილზე. ერთ ადგილზე თქვეს ხთის ხეობაში, სადაც თურმე წყალი დააკლდება ხეობას, მეორე ხეობაზე იყო თხოვნა რომ, იქ წყალი მოემატება. პატრიარქს კარგად ავუხსენი და მისმა უწმინდესობამ, ძალიან კარგად გაიგო. 

მე ვთხოვე მას, რომ პირიქით, მხარი დაეჭირა. ეს არის ჩვენი ქვეყნის განვითარების საფუძველი, ჩვენ აუცილებლად უნდა მოვახერხოთ და ავაშენოთ რაც შეიძლება მეტი ჰესი, რომ საქართველოში გამომუშავდებოდეს ენერგია. ეს შექმნის უფრო საფუძველს იმისას, რომ მრავალი ტიპის, სხვადასხვა ტიპის საწარმო დაფუძნდეს. 

ეკონომიკას და სამუშაო ადგილებს სჭირდება ენერგია და ეს კარგად უნდა გავაცნობიეროთ. თუ გნებავთ, ხვალ განიხილება მშენებლობის საკითხი გამგეობაში და აქაც მინდა ჩვენს საყვარელ სვანებს მივმართო, რომ გაგებით, დინჯად მოეკიდნონ ამ საკითხს“, - განაცხადა პრემიერმინისტრმა ივანიშვილმა.