რუსულმა გამოცემამ „RG.RU – Российская Газета“, 2014 წლის ზამთრის ოლიმპიადის უსაფრთხოების უზრუნველყოფის მიზნით, „შავი სია“ გამოაქვეყნა. 

ჩამონათვალში მოხვდა ჩეჩნეთის მოქალაქე უსუპ მაირ-ალიევის-ძე ლაკაევი, რომელის სახელიც და გვარიც რამდენიმე დღის წინ ბათუმში მომხდარ ინცინდენტში ფიგურირებდა,-ამის შესახებ ,,ტელეგრაფ. ჯი“ წერს.

გამოცემის ინფორმაციით, ზამთრის ოლიმპიადის შავ სიაში მოხვედრილი, 1988 წელს დაბადებული რუსეთის მოქალაქე სწორედ საქართველოში, ბათუმში კონტრტერორისტული ცენტრის ოპერაციის დროს დაკავებული პირია. ინფორმაცია „ტელეგრაფს“ შს სამინისტროსშიც დაუდასტურეს:

„ის დოკუმენტაცია, რომელიც აღმოაჩნდა იმ პიროვნებას, რომელიც სამართალდამცველებმა ბათუმში მომხდარი ინციდენტის შედეგად დააკავეს, და ეს მონაცემები ერთმანეთს ემთხვევა, დანარჩენს უფრო კონკრეტულად გამოძიება დაადგენს“, – განაცხადა ნინო გიორგობიანმა.

აღსანიშნავია, რომ „შავი სია“ რუსეთის ფედერალური ხელისუფლების ბრძანებულების საფუძველზე შეიქმნა. მას ხელს აწერს 2014 წლის ზამთრის 22 -ე ოლიმპიადისა და მე-12 პარაოლიმპიური ღონისძიების უსაფრთხოების უზრუნველყოფის ოპერატიული შტაბის ხელმძღვანელი სირომოლოტოვი.