გავრცელებული ინფორმაციის თანახმად, წელს ჩრდილოეთ ოსეთში მდებარე ერთადერთ ქართულ საგანმანათლებლო დაწესებულებას 125 წელი უსრულდება. სკოლა, რომელიც ვლადიკავკაზში ჯერ კიდევ 1888 წელს თერგდალეულებმა დააარსეს, უდიდესი კულტურული, საგანმანათლებლო და ისტორიული მნიშვნელობისაა.

ამ სკოლამ იქ მცხოვრები არაერთი ქართველი გამოზარდა, მათ შორის ცნობილი მოღვაწეები. 125 წლის იუბილეს ვლადიკავკაზის აკაკი წერეთლის სახელობის საგანმანათლებლო დაწესებულება არცთუ ისე სახარბიელო მდგომარეობით ხვდება. მოსწავლეთა კონტინგენტის სწრაფმა კლებამ შესაძლოა, სკოლა დახურვის პირას მიიყვანოს, იქვე მდებარე ტაძარს კი, სადაც სრულიად საქართველოს კათოლიკოს-პატრიარქი, ილია მე-2 მოინათლა, დანგრევა ემუქრება.

კულტურულ-საგანმანათლებლო ცენტრის ხელმძღვანელობა დახმარებას ითხოვს, თუმცა უშედეგოდ. სკოლის დირექტორმა, ეთერ ფიცხელაურმა თანადგომისთვის პირადად მიმართა საქართველოს კულტურისა და ძეგლთა დაცვის მინისტრს, თუმცა, სამწუხაროდ, ეს თემა გურამ ოდიშარიას დაინტერესების საგანი არ აღმოჩნდა.

"შევხვდით ბატონ ოდიშარიას, დავუტოვეთ პროექტი, მაგრამ ამან გამოხმაურება არ ჰპოვა", – აცხადებს „პრაიმტაიმთან“ საუბრისას ეთერ ფიცხელაური.