საქსტატმა გენდერული სტატისტიკის პორტალის პრეზენტაცია გამართა

ბიზნესი & ეკონომიკა - 13:31, 21 Dec, 2018

7826

საქართველოს სტატისტიკის ეროვნულმა სამსახურმა ახალი პროდუქტის - გენდერული სტატისტიკის პორტალის პრეზენტაცია გამართა.

ახალი პროდუქტი ღონისძიებაზე შეკრებილ სტუმრებს საქსტატის აღმასრულებელმა დირექტორმა, გოგიტა თოდრაძემ გააცნო. მისი განცხადებით, გენდერული სტატისტიკის პორტალი მომხმარებელს საშუალებას აძლევს ერთ სივრცეში მიიღოს საქსტატში არსებული ინფორმაცია გენდერულ ჭრილში.

გენდერული სტატისტიკის პორტალი საქსტატში გაეროს ქალთა ორგანიზაციის (UN WOMEN) ფინანსური მხარდაჭერით მომზადდა. პორტალი მოიცავს თორმეტ მიმართულებას, როგორიცაა, მოსახლეობა, განათლება, ჯანდაცვა, დასაქმება/უმუშევრობა, სამართალდარღვევები და სხვა.

დღევანდელ ღონისძიებაზე საქსტატმა მომხმარებელს გენდერული სტატისტიკის მიმართულებით კიდევ ერთი სიახლე შესთავაზა - კერძოდ, სტატისტიკური პუბლიკაცია „ქალი და კაცი საქართველოში 2018“. ეს არის რიგით მე-10 კრებული, რომელსაც საქსტატი 1999 წლიდან რეგულარულად ავრცელებს.

გამართულ პრეზენტაციას საქართველოს მთავრობის, არასამთავრობო ორგანიზაციების, საერთაშორისო ორგანიზაციებისა და სამეცნიერო წრეების წარმომადგენლები დაესწრნენ.

გენდერული სტატისტიკის პორტალი საქსტატის ვებ-გვერდზე (www.geostat.ge) განთავსდა და ხელმისაწვდომია ნებისმიერი მომხმარებლისთვის.