ვადამდელი საპარლამენტო არჩევნები და დამნაშავეების დასჯა- გაერთიანებული ოპოზიცია ხელისუფლებას მოთხოვნებს უყენებს და შეუწყვეტელ აქციებს იწყებს

პოზიცია - 12:18, 17 Dec, 2018

2509

გაერთიანებული ოპოზიციის ლიდერმა გრიგოლ ვაშაძემ დღეს გამართულ საგანგებო ბრიფინგზე სამომავლო გეგმებზე ისაუბრა. გრიგოლ ვაშაძის თქმით, ოპოზიციის მოთხოვნები უცვლელია: ჩატარდეს ვადამდელი საპარლამენტო არჩევნები პროპორციული სიით, მთლიანად შეიცვალოს საარჩევნო ადმინისტრაცია, დაბრუნდეს ხელისუფლება პოლიტიკური პროცესში, დაისაჯოს გაყალბებაში და ძალადობაში ბრალდებული პირები, მათ შორის ის სამართალდამცავები რომლებსაც 16 დეკემბრის სადამსჯელო ღონისძიება ქონდათ ჩაბარებული. გრიგოლ ვაშაძის თქმით ოპოზიცია აქციების რეჟიმში გადადის

„ვიწყებთ შეუწყვეტელ აქციებს. მშვიდობიან და კანონიერ ფარგლებში“- განაცხადა ვაშაძემ, მისი თქმით აქციების შესახებ დამატებით ინფორმაციას ოპოზიცია მოსახლეობას დღეს საღამოს გააცნობს.

„მინდა გამოვეხმაურო გახარიას განცხადებას, ჯერ იმაზე, რომ ვითომ ყვარელზე გზა გახსნილი იყო, ეს აბსოლუტურად ტყუილი იყო. როდესაც მივედით და ველისციხეში გაგვაჩერეს ადა ეს გვითხრეს, ნაწილი ჩვენი მანიფესტაციის მონაწილეები წავიდნენ და გაეჩხირნენ გრემთან, სადაც ისევე იყო გზა გადაკეტილი როგორც ყველგან. უტიფარი სიცრუეა ეს. მობილიზებული იყო არნახული რაოდენობა პოლიციის, ვისი მუნდირიც შეურაცხყო ამ ხელისუფლება, გაოგნებული პოლიციელები იდგნენ და იყურებოდნენ გარშემო და ზონდერ ბრიგადები, რომელბმაც სასიკვდილოდ კინაღამ სცემეს შოთა დალაქიშვილი. ამისთანა ე.წ. ხელისუფლების ხელში ვიმყოფები. ყველა მეთოდი გადმოღებულია პუტინის რუსეთიდან. როდესაც ისტერიულად კივიან დემოკრატიაზე მათ მხედველობაში პუტინის სუვერენული დემოკრატია აქვს. აქედან გამომდინარე გაერთიანებული ოპოზიცია ადასტურებს ყველა მოთხოვნას, რომელიც გვქონდა წამოყენებული, კატეგორიულად მოვითხოვთ უმოკლეს ვადაში ჩატარდეს საპარლამენტო არჩევნები, თავიდან ბოლომდე შეიცვალოს საარჩევნო ადმინისტრაციამ, არჩევნები ჩატარდეს პროპორციული წესით. ხელისუფლებამ კეთილი ინებოს და შევიდეს პოლიტიკურ პროცესში და დაბრუნდეს კრიმინალური მეთოდებიდან პოლიტიკურ პროცესებში. მოვითხოვთ ყველას დასჯას, ვინც ბღუჯა-ბღუჯა ყრიდა ბიულეტენებს საარჩევნო ყუთებში, იმ პიროვნების დასჯას, რომელმაც სიკვდილამდე მიიყვანა ზუგდიდის #6 სკოლის დირექტორი, ყველა იმ პირის დასჯას ვინც გუშინ მშვიდობიან მოქალაქეებს თავს დაესხნენ. ხვალიდან ვიწყებთ აქციებს, აქციები არ შეწყდება არცერთი დღე."- განაცხადა გრიგოლ ვაშაძემ.