ბათუმში მომხდარი თავდასხმის დროს რამდენიმე მამაკაცი, მათ შორის, პოლიციელი დაიჭრა. თავდასხმა პუშკინისა და ლერმონტოვის ქუჩების გადაკვეთაზე მოხდა: უცნობმა პირმა ცეცხლსასროლი იარაღიდან ცეცხლი გახსნა და რამდენჯერმე გაისროლა. ოციალურ ქსელ „ფეისბუქში“ ბათუმში მომხდარი თავდასხმის ადგილიდან კიდევ ერთი ფოტო ვრცელდება, რომელიც, სავარაუდოდ, თავდასხმიდან რამდენიმე წუთშია გადაღებული.

ფოტოზე ჩანს სასწრაფო დახმარების მანქანა, შეკრებილი ხალხი და შეფერხებული მოძრაობა გზაზე, სადაც ინფორმაციის მიხედვით, თავდასხმა მოხდა და, გავრცელებული ინფორმაციით, დაუდგენელმა პირმა მამაკაცს შვიდი ტყვია ესროლა.

მომხდართან დაკავშირებით სხვადასხვა ინფორმაცია ვრცელდება: ერთერთი ვერსიით, დაჭრილია სამი მამაკაცი, მათგან ერთი პოლიციელია. "ნიუპოსტის" ინფორმაციით, დაჭრილები რეანიმაციის განყოფილებაში გადაიყვანეს და ამ წუთებში ოპერაცია უტარდებათ. სავარაუდოდ, დაჭრილია თავად შეიარაღებული პირიც, რომელმაც ცეცხლი ჯერჯერობით დაუდგენელი მიზეზით გახსნა.

რაც შეეხება შსს-ს, „ნიუპოსტთან“ საუბარში პრესსამსახური აცხადებს: „მკვლელობის ფაქტს არ ვადასტურებთ“. ამ კომენტარის შემდეგ შსს-ს პრესსამსახურის თანამშრომელმა თავდასხმის ფაქტის დასადასტურებლად ან უარსაყოფად დამატებით ორი წუთი ითხოვა და ინფორმაციის დაზუსტების შემდეგ დაკავშირებას დაგვპირდა, თუმცა, 10 წუთის გასვლის შემდეგაც „ნიუპოსტის“ ტელეფონზე ზარი არ შემოსულა, ჩვენს ზარს კი ნომერზე 577 53 73 ** არ უპასუხეს.