გაერთიანებული ოპოზიცია 16 დეკემბერს თელავში საპროტესტო აქციას გამართავს.

"ძალა ერთობაშიას" ლიდერები, წევრები და მხრადამჭერები, სალომე ზურაბიშვილის ინაუგურაციის პარალელურად, გამოხატავაენ საკუთარ პროტესტს იმ დარღვევებთან დაკავშირებით, რომლის შედეგადაც საპრეზიდენტო არჩევნების მეორე ტური გაყალბდა და მმართველი გუნდის მიერ მხარდაჭერილმა საპრეზიდენტო კანდიდატმა სალომე ზურაბიშვილმა გაიმარჯვა.

საქართველოს რამდენიმე ქალაქში ერთდროილად გაიმართება აქციები. მთავარი აქცია კი თელავში მოეწყობა, კოლონები დაიძრებიან საქართველოს სხვადასხვა რეგიონებიდან.

"ხელისუფლებამ წაართვა მოსახლეობას არჩევანის უფლება, "ქართულმა ოცნებამ" დაინიშნა პრეზიდენტი და არ მისცა საშუალება ქართველ ხალხს თავად აერჩია. ამიტომ ჩვენს ძალიან ხმამაღალ პროტესტს გაიგებენ თელავში" - აცხადებენ გაერთიანებული ოპოზიციის წევრები.

რაც შეეხებათ მათ, ვინც გამოთქვამს სურვილს აქციას შეუერთდეს, როგორც გუშინ ოპოზიციის შტაბში გმართულ ბრიფინგზე გიორგი ვაშაძემ განაცხადა, 16 დეკემბერს, დილის 08:00 საათზე აქციის მონაწილეები თელავის მიმართულებით აეროპორტის გზატკეცილზე მდებარე "ნაციონალური მოძრაობის" ოფისის მიმდებარე ტერიტორიიდან დაიძვრებიან.

საპრეზიდენტო არჩევნების მეორე ტურის შემდეგ თბილისში, რუსთაველის გამზირზე გამართული აქციის ფარგლებში, გაერთიანებულმა ოპოზიციამ ხელისუფლებას რამდენიმე მოთხოვნა წაუყენა - საპრეზიდენტო არჩევნების შედეგების გაუქმება, საარჩევნო სისტემაში ცვლილები და ვადამდელი საპარლამენტო არჩევნების ჩატარება. გაერთიანებულმა ოპოზიციამ მმართველ გუნდს ვადა 16 დეკემბრამდე, სწორედ ინაუგურაციამდე მისცა. ხელისუფლება კი ოპოზიციის ულტიმატუმს არალეგიტიმურს უწოდებს.