პოლიციამ პარიზში "ყვითელი ჟილეტების" აქციაზე 127 ადამიანი დააკავა

მსოფლიო - 13:14, 08 Dec, 2018

1969

პარიზში ელისეს მინდვრებზე დაგეგმილ "ყვითელი ჟილეტების" საპროტესტო აქციაზე ხალხი უკვე იკრიბება. მედიის ინფორმაციით, ამ დროისთვის შეკრებილთა რიცხვი 2 ათასს აჭარბებს.

საფრანგეთის ხელისუფლებამ 8 დეკემბერს დაგეგმილი "ყვითელი ჟილეტების" აქციისთვის მზადება რამდენიმე დღით ადრე დაიწყო. უსაფრთხოებისთვის მხოლოდ პარიზის ცენტრში 8 000 ოფიცერი და 12 ჯავშანტექნიკა განთავსდა.

ამ დროისთვის პოლიციელებსა და მანიფესტანტებს შორის მასშტაბურ შეტაკებებს ადგილი არ ჰქონია. თუმცა, პოლიციამ მანიფესტანტების წინააღმდეგ ცრემლსადენი გაზი გამოიყენა. სამართალდამცავებმა 354 ადამიანი უკვე დააკავეს, მათგან 127 დროებით იზოლატორშია გადაყვანილი, ხოლო დანარჩენი გაათავისუფლეს.

აღსანიშნავია, რომ 7 დეკემბერს, სოციალურ ქსელში გამოქვეყნდა დოკუმენტი, რომელშიც პოლიციის მოქმედების გეგმის ერთი ნაწილი იყო ასახული. დოკუმენტში დეტალურადაა აღწერილი პოლიციელთა მოქმედების ინსტრუქციები იმ იურიდიული მომენტების გათვალისწინებით, რომლებიც შესაძლო არეულობის დროს უნდა იქნას გამოყენებული, ასევე, მოცემულია იმ პირთა სიაც, რომლებსაც ამ დღეებში პარიზში შესვლა უნდა აეკრძალოს.

ამ "გაჟონვის" თაობაზე ხელისუფლებამ გამოძიება დაიწყო.

"ყვითელი ჟილეტების" პროტესტი საფრანგეთში 17 ნოემბრიდან მიმდინარეობს. პარიზის გარდა, აქციები მთელი ქვეყნის მასშტაბით თითქმის ყველა დიდ ქალაქში იმართება.