ეპილეფსიის დიაგნოსტიკისა და ზედამხედველობის პროგრამის ფარგლებში იაშვილის ბავშვთა ცენტრალური საავადმყოფოს ექიმთა ჯგუფის აჭარაში ვიზიტთან დაკავშირებით

ჯანმრთელობა - 16:50, 27 Nov, 2018

1679

მ.იაშვილის სახ. ბავშვთა ცენტრალური საავადმყოფოს ექიმთა ჯგუფი ეპილეფსიის დიაგნოსტიკისა და ზედამხედველობის პროგრამის ხელშეწყობის მიზნით ნოემბერ-დეკემბერში ატარებს ვიზიტებს საქართველოს სხვადასხვა რეგიონში. აჭარაში ვიზიტი ჩატარდება 30 ნოემბერს, ვიზიტის მანძილზე ექიმი-ნევროლოგები (პროფ. თეონა შათირიშვილი, ნინო დიხამინჯია, ნევროლოგი-ეეგ სპეციალისტი თამარ ყიფიანი, ნევროლოგი ეკა გამცემლიძე) კონსულტაციებს ჩაუტარებენ ეპილეფსიაზე საეჭვო როგორც პედიატრიულ, ისე მოზრდილ პაციენტებს, საჭიროების შემთხვევაში გადაიღებენ ელექტროენცეფალოგრამას.

ნევროლოგების გარდა, აქციაში მონაწილეობას მიიღებენ: პედიატრი/პულმონოლოგი პროფ. ივანე ჩხაიძე, უროლოგი პროფ. პაატა გიორგაძე, ენდოკრინოლოგი ნინო ხელაძე, ორთოპედ/ტრავმატოლოგი თინათინ ანთაძე, ნეფროლოგი/ტოქსიკოლოგი პროფ. ოთარ რუსაძე, გასტროენტეროლოგი დავით მახათაძე, ფსიქოლოგი ნანა აკოფაშვილი, პროგრამის კოორდინატორი შორენა ქართველიშვილი.

ვიზიტის ფარგლებში ამბულატორიულ პაციენტებს ჩაუტარდებათ უფასო კონსულტაციები, შერჩეულ პაციენტებთან (მაქსიმუმ 15) გადაიღებენ ეეგ-ს, ასევე რეგიონის ნევროლოგებთან და ოჯახის ექიმებთან ჩატარდება სამუშაო შეხვედრა ეპილეფსიის დიაგნოსტიკისა და ზედამხედველობის პროგრამასთან დაკავშირებით.

კონსულტაციები დაიწყება დილის 10:00 საათზე მ.იაშვილის სახელობის ბათუმის დედათა და ბავშვთა ცენტრალური ჰოსპიტალში.