ლონდონის პოლიციამ სოლსბერიში მდებარე სათვალთვალო კამერების სამი ახალი ვიდეოჩანაწერი გამოაქვეყნა, რომელშიც დაფიქსირებულია გრუ-ს ყოფილი პოლკოვნიკის სერგეი სკრიპალისა და მისი ქალიშვილის მოწამვლაში ეჭვმიტანილების გადაადგილება. ვიდეოში ჩანს ორი მამაკაცი რომლებიც სკოტლენდ-იარდის მტკიცებით რუსეთის გრუ-ს თანამშრომლები ალექსანდრ პეტროვი და რუსლან ბოშიროვი არიან.

ერთ-ერთ ვიდეოჩანაწერში მამაკაცები სოლსბერის რკინიგზის სადგურში შედიან, დანარჩენ 2 ვიდეოში კი ქუჩაში გადაადგილდებიან. სკოტლენდ-იარდის ინფორმაციით ვიდეოჩანაწერები 4 მარტს, სოლსბერიშია გაკეთებული, სწორედ იმ დღეს, როცა სკრიპალები მოწამლეს.

The Insider და Bellingcat ერთობლივმა გამოძიებამ რუსი აგენტების ნამდვილი ვინაობა დაადგინა. როგორც მათ ანგარიშშია ნათქვამი, სკრიპალების მოწამვლაში ეჭვმიტანილი „ალექსანდრ პეტროვი“ ГРУ-ს ოფიცერი ალექსანდრ მიშკინი აღმოჩნდა. სექტემბერში იგივე საგამოძიებო ჯგუფებმა გამოიკვლიეს სკრიპალების მოწამვლის საქმეში ეჭვმიტანილი კიდევ ერთი პირის ნამდვილი ვინაობა. როგორც აღმოჩნდა რუსლან ბოშიროვის ნამდვილი სახელი და გვარი ანატოლი ჩეპიგაა.