წმინდა ანდრიას ტაძარში „მოლოტოვის კოქტეილები“ შეაგდეს

წმინდა ანდრიას ტაძარში „მოლოტოვის კოქტეილები“ შეაგდეს - კიევი მოსკოვს ადანაშაულებს

მსოფლიო - 12:24, 15 Nov, 2018

2590

დღეს დილით, უცნობმა პირებმა კიევის წმინდა ანდრიას ტაძარში „მოლოტოვის კოქტეილები“ შეაგდეს. ამის შესახებ ინფორმაციას უკრაინის მართლმადიდებელი ეკლესიის კიევის საპატრიარქოს პრესმდივანი ევსტრატი ზორია ავრცელებს.
„კიევის დროით დილის 7:20 საათზე უცნობმა პირებმა წმინდა ანდრიას ტაძრის კარებში „მოლოტოვის კოქტეილები“ შეყარეს. ხანძარი არ ყოფილა, დაზიანებული არაფერია, თუმ ცა თავდამსხმელების ქმედებების შედეგად დაშავდა კიევის საპატრიარქოს წარმომადგენელი მღვდელი. მის წინააღმდეგ თავდამსხმელებმა ძალა და გაზის ბალონები გამოიყენეს“- წერს ზორია.
„ვხედავთ, რომ მოსკოვის თანამზრახველები ცდილობენ „ცხადი მინიშნებებით“ შეაშინონ მსოფლიო საპატრიარქოს წარმომადგენლები, რომელთაც უნდა გადაეცეთ ეს ტაძარი. თუმცა როგორც მსოფლიო პატრიარქმა ბართლომეოსმა აღნიშნა „მსოფლიო საპატრიარქო არავის არ ემუქრება და არც არავის აღიქვამს საფრთხედ“- აღნიშნა ზორიამ.

შეგახსენებთ, მსოფლიო პატრიარქმა უკრაინის მართლმადიდებელი ეკლესიისთვის ავტოკეფალიის მინიჭებასთან დაკავშირებით გადაწყვეტილება მიიღო, ამის შესახებ საუბარია განცხადებაში, რომელიც მსოფლიო საპატრიარქოს საიტზე გამოქვეყნდა. კონსტანტინოპოლის მართლმადიდებელი ეკლესიის წმიდა სინოდის გადაწყვეტილებით, უკრაინის მართლმადიდებელი ეკლესიის კიევის საპატრიარქოს მეთაური - პატრიარქი ფილარეტი და უკრაინის ავტოკეფალური მართლმადიდებელი ეკლესიის მეთაური - მაკარ მალეტიჩი და მათი მრევლი კანონიკურ სტატუსში აღადგინა. ამასთანავე დაადასტურა უკვე მიღებული გადაწვეტილება იმის შესახებ, რომ მსოფლიო საპატრიარქო იწყებს უკრაინის ეკლესიისთვის ავტოკეფალიის მინიჭებას.