მცხეთაში, რესტორან "გუჯარში" მაია ფანჯიკიძისა და რუსეთის პრეზიდენტის ადმინისტრაციის წარმომადგენლების ვახშამზე შეხვედრის შესახებ გამოქვეყნებული ინფორმაციის გამო "ექსპრესნიუსის" რედაქტორს ირაკლი მანაგაძეს ემუქრებიან.

ინფორმაცია ექსკლუზიურ წყაროზე დაყრდნობით "ექსპრესნიუსმა" 3 სექტემბერს გამოაქვეყნა. ის "ნიუპოსტმაც" გაავრცელა. "ექსპრესნიუსის" მიერ რესტორნის მენეჯმენტთან ინფორმაციის გადამოწმებისას ფაქტი დადასტურდა. ამის შემდგომ სააგენტომ სამინისტროს პოზიციაც დააფიქსირა, სადაც მაია ფანჯიკიძე აღნიშნულ ვიზიტს უარყოფს. სასამართლოში სარჩელის შეტანის შესახებ მინისტრმა განცხადება 4 სექტემბერს გააკეთა, თუმცა, სარჩელი ამ დრომდე სასმართლოში არ შესულა.

როგორც ირაკლი მანაგაძე აცხადებს, ბოლო დღეების განმავლობაში მის მობილურ ტელეფონზე მუქარის ზარები გახშირდა. მისივე თქმით, რესტორნის მეპატრონე, მოსკოვსა და თბილისში რესტორნების ქსელის მფლობელი ელგუჯა ბუბუტეიშვილიც დაუკავშირდა და ინფორმაციის წაშლა ჯერ მეგობრული ტონით, შემდეგ კი უხეშად მოსთხოვა:

"მირეკავენ დაფარული ნომრებიდან და კატეგორიულად მთხოვენ, მაია ფანჯიკიძის შესახებ "ექსპრესნიუსის" მიერ გავრცელებული ინფორმაციის მოხსნას. მას შემდეგ რაც ამაზე კატეგორიულად უარს ვამბობ, შემდეგ იწყებენ მუქარას, ხელების მოტეხვის და თავის მოჭრის შესახებ. დიდხანს ვერ ვუყურებ ამ აბსურდს", - წერს ირაკლი მანაგაძე "ფეისბუქზე" და აცხადებს, რომ ფაქტის შესახებ უკვე ჩააყენა საქმის კურსში შსს საზოგადოებასთან ურთიერთობის სამსახურის უფროსი ნინო გიორგობიანი.