ამის შესახებ ბაჩო ახალაიას მეუღლე ანი ნადარეიშვილი "ფეისბუქის" საკუთარ გვერდზე წერს.

როგორც "ნიუპოსტმა" დაადგინა, ბაჩო ახალაიას წინააღმდეგ ჩვენებას აძლევენ ე.წ. კანონიერი ქურდები: მალხაზ ზედელაშვილი, ნიკოლოზ მახარაძე, პლატონ მამარდაშვილი და სხვები, ასევე ე.წ. ზონის მაყურებლები: ზურაბ ვიბლიანი, გიორგი ავალიანი და ცინდელიანი.

უფრო ადრე ანი ნადარეიშვილმა გამოაქვეყნა ფრაგმენტი ერთერთი "კანონიერი ქურდის" წერილიდან, სადაც კრიმინალური ავტორიტეტი ახალაიას ამხელს:

"ჩვენ ობშიაკში 200 ათასამდე გვქონდა, მაგრამ ახალაიას ფული არ აინტერესებდა, მას ტყავი უნდოდა, ანუ სია, იმისათვის რომ წელში გაეტეხა ქურდები", - აღნიშნულია ხელნაწერში.

საქალაქო სასამართლოში დღეს განახლებულ პროცესზე ბაჩო ახალაიამ თავის სიტყვაში აღნიშნა, რომ ვერასდროს იფიქრებდა, თუ ე.წ. კანონიერი ქურდების წინააღმდეგ ბრძოლის გამო ოდესმე თავის მართლება პროკურატურასთან მოუწევდა:

"მე ყოველთვის ვფიქრობდი, რომ კანონიერი ქურდები ეცდებოდნენ თავისი ჩამორთმეული პრივილეგიების აღდგენას და ჩემს დისკრედიტაციას ყველანაირი გზით, მაგრამ ვერ წარმოვიდგენდი რომ იგივე მომიწევდა პროკურატურასთანაც. თუმცა როდესაც დღეს მთავარი პროკურორი არის ადამიანი, რომელიც ცოტა ხნის წინ იყო კანონიერი ქურდის კალაშოვის ადვოკატი, არც უნდა იყოს გასაკვირი, რომ ქურდების გარდა ჩემს წინააღმდეგ პროკურატურაც მოქმედებს...", - თქვა სასამართლოზე ბაჩო ახალაიამ.