აღნიშნულ ინფორმაციას კი გაზეთი "ბათუმელები" ავრცელებს. როგორც სტატიაშია ნათქვამი, წიგნის მაღაზია "ლამპარი" ბათუმში მამა ბასილის კურთხევით დაარსდა, კონსულტანეტებს კი მამა ბასილის მრევლიდან არჩევენ.

მაღაზიაში კონსულტანტებმა ზაზა ბურჭულაძის "ხსნადი კაფკა" საკუთარი ხელფასით შეიძინეს და დაწვეს. აღნიშნულ საკითხზე კი ბურჭულაძე "ბათუმელებთან" საუბრობს:

"ახლა გერმანიაში ვიმყოფები. აუტოდაფე აქ ბოლოს 80 წლის წინ მოაწყვეს. 1933 წლის 10 მაისს ნაცისტებმა იმ ავტორთა წიგნები დაწვეს, რომელთა ტექსტებიც ნაციონალ-სოციალიზმის იდეოლოგიას არ შეესაბამებოდა. მაშინ ფაშისტებმა კოცონზე დაწვეს "მესამე რაიხის მტრების" 20 ათასამდე წიგნი: ჰაინრიხ ჰაინეს, ფროიდის, ბრეხტის, თომას მანის, შტეფან ცვაიგის, რობერტ მუზილის და სხვათა ნაშრომები. ღონისძიებას პროპაგანდის მინისტრი, იოზეფ გებელსი ხელმძღვანელობდა. ამის გამო, დღეს ბერლინში, ბებელის მოედანზე, მიხა ულმანის მემორიალი დგას. ბებელპლაცზე უთუოდ ფეხით უნდა გაიარო, რომ "ბიბლიოთეკა" ნახო.

რამდენადაც ის მიწის ზევით კი არ დგას, არამედ მიწაშია "ჩაძირული". დაახლოებით მოედნის ცენტრში, ჰუმბოლდტის უნივერსიტეტის წინ, ქვაფენილზევე, სქელი კვადრატული მინა დევს – ზედ ფეხით გავლა შეიძლება. მინის ქვეშ კი, მიწაში, მუდამ განათებული თეთრი ოთახია, რომლის ოთხივე კედელს ასევე თეთრი და ცარიელი თაროები შეადგენს. ცხადია, წიგნებით დახუნძლული თაროები იმ ეფექტს ვერ შექმნიდა, რასაც მათი შეუვსებლობა ქმნის. მოცემულ შემთხვევაში სწორედ ცარიელი თაროებია შემაწუხებელი და დამთრგუნველი. "ჩაძირული ბიბლიოთეკა" თავისი შინაარსით, მეტისმეტად მწუხარე და ხმაურიანი რამეა.

სტერილური თაროებიდან წიგნების აჩრდილები ყვირიან, ჩხავიან, ღრიალებენ... სიცარიელესაც შეუძლია იხმაუროს. და ბოლოს, იქვე დამონტაჟებულია მემორიალური დაფა ჰაინრიხ ჰაინეს სიტყვებით: "ეს მხოლოდ დასაწყისია. სადაც წვავენ წიგნებს, ბოლოს ადამიანებსაც დაწვავენ". სექსით დაკავებულია ნებისმიერი ცოცხალი ორგანიზმი დედამიწაზე. ასეთია სამყაროს მოწყობის მოდელი. ეს გამრავლების ფორმულაა. სექსი სიცოცხლის აუცილებელი პირობაა. სექსის არარსებობა კი სიკვდილია.

ვერ ვხდები, რატომ ელტვიან ქართველი ახალგაზრდები სიკვდილს და არა სიცოცხლეს? სხვა თუ არაფერი, სექსი ხომ წმინდა ფიზიოლოგიური მოთხოვნილებაა?! იმ გოგონებს კი, ვინც ჩემი წიგნები დაწვეს, ვურჩევდი, მალე გამოფხიზლებულიყვნენ და მალე მიეტოვებინოთ "ქალიშვილობის ინსტიტუტი". ქალიშვილობა ვერ გადაარჩენს საქართველოს", - აცხადებს ბურჭულაძე.