გერგედავას დედა ნაირა კალანდია ,,კვირის პალიტრასთან“ საუბრისას ჰყვება, რომ ცხედრის ნაწილების გაერთიანება მხოლოდ წლების შემდეგ აფხაზი მეგობრბეის დახმარებით შეძლო. სოხუმის დაცემის შემდეგ გერგედავების ოჯახი ტყვეობაში აღმოჩნდა.

17 წლის ნუკრი გერგედავა დედის თვალწინ დახვრიტეს, დედა კი სასტიკად აწამეს. ამ სატანჯველის გამოვლის მიუხედავად, ინგირამდე ჩამოაღწია და შვილის ცხვირის ხრტილი თან წამოიღო. დედის თხოვნით, ნუკრი გერგედავას სხეული მისმა აფხაზმა მეგობრებმა აფხაზეთში, სოფელ ვარჩეში დაკრძალეს. დედამ კი შვილის სხეულის ნაწილი გარდაცვლილ მეუღლესთან ერთად თბილისში დაკრძალა. ,,ყოველი სექტემბრის მოახლოება ჩემთვის იმ კოშმარის განახლებაა, რაც გამოვიარეთ.

ჩემი ნუკრი არძინბას დაბადების დღეზე, 30 სექტემბერს დახვრიტეს. სამწუხაროდ, ეს საშინელება გააფხაზებულმა ქართველმა ჩაიდინა. შარშან ჩემი ვაჟის ბავშვობის აფხაზი მეგობრები შემეხმიანენ, შესაძლოა ნუკრის გადასვენებამ სადმე სხვაგან მოგვიწიოს, რადგან ვარჩეს სასაფლაოს აუქმებენო. იქ ძირითადად, ქართველები იყვნენ დასაფლავებული. ძალიან ავნერვიულდით და ვთხოვეთ, თუ მოხერხდებოდა, ნუკრის ნეშტი ინგირამდე მოეტანათ. მორიდებით მითხრა, ხარჯებთან არის დაკავშირებული, საკუთარი ჯიბიდან გავიღებდი, მაგრამ ამის საშუალება არა მაქვსო. მოკლედ, ნუკრის ნეშტის ამოთხრას, ყუთში მოთავსებას და ტრანსპორტირებას ფული სჭირდებოდა.

თანაც ხომ არ გგონიათ, რუსი მესაზღვრეები ნუკრის ცხედარს უპრობლემოდ გამოატარებდნენ?! მინიმალური თანხა 900 დოლარი იყო. იმ ახალგაზრდამ, თუ რამე მორჩება, უკან გამოგიგზავნითო... ერთმა ღვთის მადლით აღსავსე ქალმა მასესხა ფული, რომელიც შუამავალს გადავეცით,“-ჰყვება ნუკრი გერგედავას დედა ,,კვირის პალიტრასთან“ საუბრისას. ცხედრის იდენტიფიცირება თავის ქალაზე ნატყვიარითა და მეგობრისგან ჩატანებული ტყავის ქურთუკით მოხერხდა. დედა ამბობს, რომ მან შეძლო 19 წლის შემდეგ ცხედრის ნაწილების გაერთიანება და ეს უდიდეს ტკივილთან ერთად მისთვის სიხარულიც არის, რადგან ახლა შვილის საფლავზე მისვლა მაინც შეეძლება.