აშშ-ის შიდა უსაფრთხოების და იუსტიციის სამინისტრომ, გამოძიების ფედერალური ბიურომ და ეროვნული დაზვერვის დირექტორის ოფისმა აშშ-ის კონგრესის არჩევნებთან დაკავშირებით განცხადება გამოაქვეყნეს, რომელშიც რუსეთს კონგრესის არჩევნებზე ზეგავლენის მოხდენის მცდელობაში ადანაშაულებენ:

„ამერიკელებმა უნდა იცოდნენ, რომ უცხოელი მოთამაშეები- განსაკუთრებით რუსეთი - აგრძელებენ საზოგადოებრივ და ამომრჩევლის განწყობაზე ზემოქმედების მცდელობას- რომლის მიზანიც არის უთანხმოების დათესვა, ამას ისინი აკეთებენ პოლიტიკურ პროცესებთან და კანდიდატებთან დაკავშირებით ყალბი ინფორმაციების გავრცელებით, ავრცელებენ პროპაგანდას სოციალურ ქსლებში და სხვა ტაქტიკის დახმარებით. ამერიკელ ხალხს შეუძლია წინ აღუდგეს ამ მცდელობებს იმით, რომ იყოს უფრო გაცნობიერებული, შეატყობინოს შესაბამის უწყებებს მსგავსი ქმედებების შესახებ და მომავალში ინფორმაციის მოხმარებისას იყოს უფრო ყურადღებიანი.“- ნათქვამია აშშ-ის სპეცსამსახურების განცხადებაში.

განცხადებაში ასევე ნათქვამია, რომ აშშ არ მოითმენს რუსეთის, ჩინეთის, ირანის და სხვა ქვეყნების მხრიდან არჩევნებში ჩარევას.

სექტემბერში აშშ-ის პრეზიდენტმა დონალდ ტრამპმა ხელი მოაწერა ბრძანებას სანქციების შესახებ, რომელიც ქვეყენაში არჩევნებში ჩარევას ეხება. შესაძლო შეზღუდვებს შორისაა აქტივების გაყინბა და აშშ-ის ბანკებთან საქმიანობის წარმოება. ამერიკელ ფიზიკურ და იურიდიულ პირებს აეკრძალებათ იმ სტრუქტურებთან თანამშრომლობა, რომლების წინააღმდეგაც სანქციები გატარდება.

აშშ-ში კონგრესის არჩევნები 6 ნოემბერს ტარდება. არჩევნებზე წარმომადგენელთა პალატის წევრებს და 35 სენატორს აირჩევენ, ასევე რამდენიმე შტატის ხელმძღვანელს.