ამერიკის შეერთებულმა შტატებმა ირანის წინააღმდეგ დაწესებული სანქციები განაახლა

მსოფლიო - 20:56, 05 Nov, 2018

1752

ამერიკის შეერთებულმა შტატებმა ირანის წინააღმდეგ დაწესებული სანქციები აღადგინა, რომელიც 2015 წელს ბირთვული შეთანხმების შედეგად იყო მოხსნილი.

დონალდ ტრამპის განცხადებით, ვაშინგტონის მიზანია, თეირანი არჩევანის წინაშე დააყენოს, ან შეწყვიტოს მავნებლური ქმედება და უარი თქვას ბირთვულ ამბიციებზე ან გააგრძელოს გზა ეკონომიკური კატასტროფისკენ.

სანქციები დაუწესდება 700 იურიდიულ და ფიზიკურ პირს, რომელთაგან 300 -ზე მეტი პირი ადრე სანქციების სიაში არ იყო.

აშშ-ის მიერ დაწესებული სანქციები უკრძალავს ფიზიკურ პირებს და კომპანიებს, ითანამშრომლონ, გაყიდონ პროდუქცია, გაუწიონ მომსახურება, დააფინანსონ, მატერიალურად ან ტექნოლოგიურად მხარი დაუჭირონ ირანის ნაციონალურ ნავთობის კომპანიას ან ირანის ცენტრალურ ბანკს. აკრძალვებში მოხვდა ირანიდან ნავთობის ან ნავთობპროდუქტების შესყდვა, გაყიდვა, ტრანსპორტირება ან მოპოვება.

ირანული ნავთობის იმპორტზე დაწესებული ემბარგოსგან 180 დღის ვადით გათავისუფლებულია რვა ქვეყანა: ჩინეთი, ინდოეთი, საბერძნეთი, იტალია, ტაივანი, იაპონია, თურქეთი და სამხრეთ კორეა.

ირანის პრეზიდენტის ჰასან როუჰანის თქმით, აშშ-ის სანქციების მიუხედავად, ირანი თავისი ნავთობის გაყიდვას გააგრძელებს და აშშ ვერ შეძლებს ირანის ნავთობის გაყიდვების ნულამდე დაყვანას.

„აშშ-ს სურდა, რომ ირანული ნავთობის გაყიდვები ნულამდე დაეყვანა, მაგრამ ჩვენ გავაგრძელებთ ჩვენი ნავთობის გაყიდვას რომ სანქციები გავარღვიოთ“, – განაცხადა როუჰანიმ.