რეგიონული განვითარებისა და ინფრასტრუქტურის მინისტრი მაია ცქიტიშვილი საპრეზიდენტო არჩევნების მეორე ტურს ეხმაურება. სახელმწიფო მინისტრი მიიჩნევს, რომ ოპოზიციის მხრიდან აგრესიული გზავნილები გააქტიურდება, თუმცა დესტაბილიზაციაზე საუბრაი გადაჭარბებული იქნება:

„მე ვხედავ, პირველ რიგში, იმის საფრთხეს, რომ ის აგრესიული ფონი, რომელიც ჩვენ ვიხილეთ ბოლო 2 თვის განმავლობაში, ის აგრესიული გზავნილები, რომელიც პირველ რიგში "ნაციონალური მოძრაობის" მხრიდან ძალიან აქტიურად მოდიოდა, ბუნებრივია, ეს პროცესები ქვეყანაში გააქტიურდება. დესტაბილიზაციაზე საუბარი გადაჭარბებული შეფასება იქნება, მაგრამ სიმშვიდესთან საქმე რომ არ გვექნება, ცხადია",- განაცხადა ცქიტიშვილმა.

შეგახსენებთ, რომ რამდენიმე დღის წინ საპარლამენტო უმრავლესობის წევრმა გედევან ფოფხაძემ განაცხადა, რომ იმ შემთხვევაში თუ გაერთიანებული ოპოზიციის კანდიდატი გრიგოლ ვაშაძე პრეზიდენტი გახდება, ეს სამოქალაქო ომისკენ გადადგმული რეალური ნაბიჯი იქნება. ფოფხაძის განცხადებას, მმართველი გუნდის გარკვეული ნაწილი დაეთანხმა.