ოპოზიცია ენზელ მკოიანისთვის დეპუტატის იმუნიტეტის შეწყვეტას ითხოვს

პოლიტიკა - 19:02, 31 Oct, 2018

845

ახალქალაქში მომხდარი დაპირისპირების გამო გაერთიანებული ოპოზიციის წევრი ლევან ბეჟაშვილი ენზელ მკოიანისთვის, რომლის ძმაც ინციდენტში მონაწილეობდა, დეპუტატის იმუნიტეტის შეწყვეტას ითხოვს. ამასთანავე ოპოზიცია იმ ექიმების პასუხისმგებლობის საკითხის დაყენებასაც ითხოვს, რომლებმაც მათი თქმით, პაციენტებს სათანადო მკურნალობა არ ჩაუტარეს და სახლში გაწერეს, რის შემდეგაც მათი მდგომარეობა დამძიმდა და თბილისში ტრანსპორტირება გახდა საჭირო.

„პროკურატურას მოვთხოვთ, რომ მოხდეს დეპუტატის იმუნიტეტის შეწყვეტა და ამ საქმის უსწრაფესი გამოძიება. ჩვენ ვხედავთ, რომ ხელისუფლება არ იხევს უკან, ხელისუფლება ძალადობს და ქვეყანაში უნდა არსებობდეს რაიმე ინსტიტუცია, რომელიც ერთგვარ ბალანსს შექმნის ამ ხელისუფლების განუკითხაობასთან მიმართებაში. თუ გამოძიება დაინტერესებულია საქმის ობიექტურ და ოპერატიულ გამოძიებაში, დღეს მთელი ღამის და დღის განმავლობაში ერთი გამომძიებელი მაინც უნდა მოსულიყო და საგამოძიებო მოქმედებები ჩაეტარებინა, ელემენტარულად, ექიმებისთვის ეკითხა, შესაძლებელი არის თუ არა დაზარალებულების დაკითხვა.“ - განაცხადა ლევან ბეჟაშვილმა.

ახალქალაქში მომხდარი დაპირისპირების დროს დაშავებული ოპოზიციის წევრები, დღეს კლინიკაში ენმ-ს წევრმა ლევან ბეჟაშვილმა მოინახულა. სამივე დაშავებულს ტვინის შერყევა, სახის ძვლების მოტეხილობა და ქალა ტვინის დახურული ტრავმა აღენიშნება.