„ეს არის ძალადობის სამარცხვინო გაპრავება“ - ოპოზიცია ახალციხეში მომხდარს სუსტი ხელისუფლების პოზიციას უწოდებს

პოლიტიკა - 16:02, 31 Oct, 2018

863

"ქართული ოცნების" აქტივისტების მიერ გაერთიანებული ოპოზიციის წევრებზე განხორციელებული თავდასხმა განხილვის მთავარი თემაა პარლამენტში.

ხელისუფლება თავის მართლების რეჟიმშია და ამბობს, რომ ოპოზიციის მხრიდან ადგილი ჰქონდა პროვოკაციას.

"ძალადობის სამარცხვინო გაპრავება"- ეს კი ოპოზიციის შეფასებაა.

„ეს არის პირდაპირი მანიშნებელი იმ აგონიისა, რომელშიც დღეს არის ხელისუფლება. ამას სჭირდება ახლა მყისიერი რეაგირება. აბსოლუტურად ნათელი არის ამაში ვინ მონაწილეობდა. დეპუტატი "ქართული ოცნების" და მისი ძმა და ის, რაც მათ გააკეთეს, ამაზე აუცილებად უნდა მოხდეს მყისიერი რეაგირება და უნდა იყვნენ ეს ადამიანები დაკავებული. დღეს ჩვენ პარლამენტიდან მოვისმინეთ აბსოლუტურად სამარცხვინო გაპრავება იმისა, რომ თურმე გაერთიანებული ოპოზიციის წარმომადგენლები პლაკატებს ხევდნენ და ამით იყო განპირობებული და გამართლებული გაერთიანებული ოპოზიციის შტაბის დარბევა. ახლა ამაზეც კი წავიდა ხელისუფლება, რომ ამით ამართლებს იმ ძალადობას, რაც მოხდა ახალქალაქში. საბოლოო ჯამში ხელისუფლებას ეს ამბავი არ გაუვა. ისინი ამ არჩევნებს ნამდვილად წააგებენ და ახლა იმედი მაქვს, რომ პირველი ტურიდან მეორემდე ძალადობის ესკალირებას ისე არ მოახდენენ, რომ შეუქცევადი რაღაც პროცესები დაიწყოს,“-განაცხადა სერგი კაპანაძემ.

დამარცხებული და სუსტი ხელისუფლების ქმედებას უწოდებს დეპუტატი სერგო რატიანი მმართველი პარტიის ანგარიშსწორებას.

„ჩვენ გუშინ ვიხილეთ ძალადობა, ეს ძალადობა არ არის პირველი. იქ სადაც უჭირს „ქართულ ოცნებას“ არჩევნებში, იქ ის მიმართავს ძალადობას. ჩვენ გვახსოვს "ევროპულ საქართველოს" ადიგენის პარტიის ხელმძღვანელის თავდასხმა, სადღაც ივლისში. ჩვენ გვახსოვს კორცხელი. გუშინ იყო თავდასხმები და ვფიქრობ, რომ ეს მეთოდი არის სუსტი, დამარცხებული ხელისუფლების არაადეკვატური მცდელობები,“-განაცხადა სერგო რატიანმა.

თავდასხმა გაერთიანებული ოპოზიციის შტაბის წევრებზე ახალქალაქში გუშინ მოხდა. ოპოზიციის წევრებს „ქართული ოცნების“ დეპუტატები ენძელ მკოიანი და მისი 20 კაციანი დაჯგუფება გაუსწორდა.