"ერთხელ უცნაური რამ შემემთხვა: ვიჯექი ერთ ხიდზე მარტო და მეტირებოდა... ისეთები მოვუყევი ერთ კაცზე, სუყველაზე ახლო მეგობრებისთვის რომ არ მომიყოლია"

სოც.მედია - 14:57, 31 Oct, 2018

2454

სოციალურ ქსელში მწერალი ლია ლიქოკელი ჩანახატს აქვეყნებს:

"ერთხელ უცნაური რამ შემემთხვა:

შეღამებული იყო. ვიჯექი ერთ ხიდზე მარტო, მტკვარს გადავცქეროდი და მეტირებოდა. ჩავრგე თავი ხელებში და ვფიქრობ, რა ვქნა, აქვე გადავხტე თუ უფრო სიმპათიური ხიდი ვიპოვო.

უცებ ორი გოგო წამომადგა თავზე.

- აბა-აბა ეგეთები არ იყოს, - მეუბნება ერთი, უფრო ფუმფულა და სასწაულად მოძრავი.

კარგად ვარ-მეთქი, შევღიმილე.

არა, არა ხარ კარგადო. არავითარი ტირილი, არ გავიგო ტირილიო. ადე, წამო ჩვენთანო, დამიცაცხანა.

ვასავსავე ხელები, არა მეთქი. წამავლეს ხელი და წამიყვანეს.

იქვე, ახლო ბაღში დავსხედით. გზაშივე დაასკვნეს - ბიჭის ამბავი იქნებაო. არც იყო უმაგისობა, ერია ერთი-ორი კაცი ჩემ ღნავილში.

ნუ გეშინია, ჩვენც მაგ დღეში ვართო, მანუგეშეს და ათ წუთში უკვე კარგად ვიცოდი იმათი ბიჭების ამბები.

ჰოდა, დამსვეს და მომაყოლეს მეც.

და ისეთები მოვუყევი ერთ კაცზე, სუყველაზე ახლო მეგობრებისთვის რომ არ მომიყოლია.

ისე მომეშვა, ისე ამოვისუნთქე.

ისე საყვარლად დამარიგეს ჭკუა, ბებიაგოგოებივით. პატარები იყვნენ თან, ჩემზე ათი წლით უმცროსები.

წამოვედი მერე, დამსუბუქებული და გაცინებული. დავტოვე ისინი იმ ღამის ბაღში, ისევ თავის ბიჭებზე მოქოთქოთეები.