„როგორც აგდებული ქვა არ ასცდება მიწას, ისე თქვენ არ აგცდებათ დამარცხება"

„როგორც აგდებული ქვა არ ასცდება მიწას, ისე თქვენ არ აგცდებათ დამარცხება" - სერგო რატიანი „ოცნებას“ მიმართავს

პოლიტიკა - 13:45, 31 Oct, 2018

478

პარლამენტის საშემოდგომი სესიის პლენარული სხდომა ხმაურის ფონზე მიმდინარეობს. „როგორც აგდებული ქვა არ ასცდება მიწას, ისე თქვენ არ აგცდებათ დამარცხება", - მიმართა სერგო რატიანმა მმართველ გუნდს.

„მთავარი, რის გამოც თქვენ დამარცხდით, არის ის სიღარიბე, რომელიც თქვენ მოიტანეთ; მთავარი იყო კორუფცია, რომელიც მოიტანეთ და დააბრუნეთ შევარდნაძის დროინდელი კორუფცია; მთავარი იყო ის ძალადობა, რომელიც დააბრუნეთ; მთავარი იყო ის, როდესაც ქართველმა ხალხმა დაინახა, რომ სარალიძის შემთხვევაში თქვენი ჩინოვნიკები ხელს აფარებდნენ მკვლელებს და მთავარია, რომ მათ დაინახეს თქვენ, პარლამენტი, ხელს აფარებდით პროკურორებს.

სწორედ ამიტომ გითხრათ ქართველმა ხალხმა უარი. ქართველმა ხალხმა გააცნობიერა თუ რა საშიშროების წინაშე იდგა. თქვენმა პრეზიდენტობის კანდიდატმა განაცხადა, რომ 2008 წელს საქართველომ დაიწყო ომი, ამას არ დაუშვებდა ქართველი ამომრჩეველი და ხალხი"- განაცხადა "ევროპული საქართველოს" წევრმა.

დეპუტატის განცხადებით "ქართულ ოცნებაში" პოლიტიკური კრიზისია.

"დემოკრატიულობის ტესტი მაშინ არ არის, როდესაც იგებთ და კარგი რეიტინგები გაქვთ. ეს ტესტი ბარდება მაშინ, როდესაც აგებთ არჩევნებს და სწორედ ამ დროს, ყველა იმ შემთხვევაში, როდესაც აგებდით და საკმაოდ სუსტად გრძნობდით თავს, მიმართავდით ძალადობას.

როგორც აგდებული ქვა არ ასცდება მიწას, ისე თქვენ არ აგცდებათ დამარცხება. ეს ბუნებრივია და ამაში არაფერია გასაკვირი. მთავარია, რომ ეს დამარცხება არ იყოს მტკივნეული ქვეყნისთვის და არ იყოს მტკივნეული საზოგადოებისთვის, თქვენთვის და ჩვენთვის ყველასთვის“, -განაცხადა სერგო რატიანმა.