" ჩვენ უკვე 5 რეგიონში ვიყავით, ახლა ხარაგაულში მივდივართ, სადაც მაღალმთიანი სოფლების 350–მდე პაციენტს მოვემსახურებით. მათ ყველანაირი სახის გამოკვლევა ჩაუტარდებათ. ექიმები გვიერთებიან ასევე რეგიონებიდანაც, მაგალითად ხარაგაულში გურიის რამოდენიმე ექიმი დაგვემხმარება",–აცხადებს რესპუბლიკური საავადმყოფოს ექიმი მაკა ბულეიშვილი "ექსპრესნიუსთან" საუბრისას.

მისივე თქმით, სამედიცინო გამოკვლევებს წლის ბოლომდე საქართველოს კიდევ ბევრ რეგიონში ჩაატარებენ.

"ჩვენ ვგეგმავთ სამეგრელოში წასვლას, დუშეთიდან არის მოთხოვნა და მეორედ წავალთ იქ, მოთხოვნა არის ასევე კახეთიდან. წლის ბოლომდე საქართველოს კიდევ ბევრ რეგიონში ვაპირებთ სამედიცინო გამოკვლევების ჩატარებას",– აღნიშნა მაკა ბულეიშვილმა.

მისივე ინფორმაციით, ექიმთა ჯგუფი რეგიონებში ტრენინგების ჩატარებასაც გეგმავს.

ბულეიშვილის განცხადებით, რეგიონების მოსახლეობას საყოველთაო დაზღვევის შესახებაც მიაწვდიან ინფორმაციას, რაზეც მისივე თქმით, მოსახლეობა ნაკლებად ინფორმირებულია.

აღნიშნულ პროექტში ძირითადად რესპუბლიკური საავადმყოფოს ექიმები არიან ჩართული, თუმცა მათ თბილისის სხვადასხვა საავადმყოფოს 15 ექიმი და საქართველოს სხვადასხვა რეგიონის მედპერსონალიც უერთდება.

აღსანიშნავია, რომ მაკა ბულეიშვილის განმარტებით, ისინი ამ პროექტს საკუთარი ხარჯებით ახორციელებენ.

"რეგიონებში ყოველ შაბათ–კვირას მივდივართ, საკუთარი ხარჯებით მიგვაქვს აპარატურა და შეძლებისდაგვარად პრეპარატებიც"– აცხადებს ბულეიშვილი.