„თიბისი ბანკის“ სამეთვალყურეო საბჭოს თავმჯდომარე მამუკა ხაზარაძე ადასტურებს, რომ ბიზნესმენ ვანო ჩხარტიშვილთან ბიზნეს-დავის პროცესში „ქართული ოცნების“ თავმჯდომარე, მილიარდერი ბიძინა ივანიშვილიც იყო ჩართული.

„პასუხი ძალიან მარტივია: მე მივესალმები, როცა ადამიანები დავის გადაწყვეტას ცდილობენ, მითუმეტეს - ბიზნესმენებს შორის. რადგან დამისვით ეს კითხვა გიპასუხებთ, ვანოს (ჩარტიშვილს) უნდოდა არასამართლიანად, სიტყვას ვეძებ რა სიტყვა გამოვიყენო - “წაეღლიტა” „თიბისი ბანკისთვის“ უსამართლოდ თანხა, ვიყავით სასამართლოში და ეს საკითხი მოგვარდა როგორც უნდა მოგვარებულიყო.

იცით რა, ჩვენ შევხვდით მისი (ბიძინა ივანიშვილის) შუამდგომლობით და იქ გაირკვა ყველაფერი სამართლიანად, აქვე იმასაც დავამატებ, რომ ვანოს (ჩხარტიშვილს) ჰყავდა ერთი მოსამართლე, რომელთანაც ყველა საქმე იკრიბებოდა საოცრად. ყველა საქმე, რომელიც მას ჰქონდა წამოწყებული სხვა ბიზნეს კომპანიების წინააღმდეგ, ყველაფერი რატომღაც ერთ მოსამართლესთან იკრიბებოდა. ეს თქვენ გაარკვიეთ რატომ და როგორ“, - განაცხადა ხაზარაძემ.

შეგახსენებთ, რამდენიმე დღის წინ ბიძინა ივანიშვილმა სატელევიზიო ინტერვიუში განაცხადა, რომ საქართველოს დღეს აქვს ისეთი სასამართლო, როგორიც მას უნდა ჰქონდეს და ამ კონტექსტში მან ხაზარაძის და ჩხარტიშვილის ბიზნეს-დავაში მის როლზე ისაუბრა.